Champhai district-a chêng mipui zinga 2.97%-in HIV/AIDS an vei

Champhai District AIDS Prevention and Control Committee (DAPCC) chu an chairman James Lalrinchhana, bawrhsap hoin DC conference hall-ah an ṭhukhawm. National AIDS Control Organization (NACO) chhinchhiah danin, Champhai district mipui zinga 2.97%-in HIV/AIDS an vei tih tarlan a ni.

Ṭhutkhawma tarlan danin, National AIDS Control Organization (NACO) 2022 report chuan Champhai district-ah HIV/AIDS vei mi 1,664 hmuh chhuah a ni tawh a, chu chu district pumpuia mihring awm zat aṭanga chhûtin 2.97% a nih thu a tarlang.

Mizoramah a tlang­puiin damdawi khawih leh mipat hmeichhiatna hman khawlohna aṭanga HIV kai an tam ber a, mipui mimirah HIV a lut nasa tawh.

Champhai DC chuan, tun hma aṭanga HIV/AIDS dona kalpuiin rah ṭha a chhuah thu leh hmalaknate a thlawn loh thu a sawi a, "Champhai district chu ramri dep ruihhlo tawlh rûkna kawng a nih avangin ruihhlo eng emaw zat thlauh a ni a, thawhhona ṭha tak hnuaiah chak taka ruihhlo do niin, tam tak man a ni. Ruihhlo do hian HIV/AIDS dona kawngah awmze thui tak a nei tel," a ti a, HIV/AIDS donaah thâ thlah a thian loh thu a sawi.

Meeting-ah hian DAPCC kaltlanga HIV/AIDS chungchang inzirtirna neih ṭhin chu changtlung zawka kalpui dan tur sawiho a ni a; Champhai district-ah HIV a darh zel loh nan leh HIV vei mekte'n inenkawlna ṭha an dawn theih nan 'Zoram Harh Rawh Campaign' hmangin kumin June-October thla chhungin HIV/AIDS awareness campaign kalpui an rêl.

Champhai district-a khaw hrang hrang 67 leh zirna-inahte HIV/AIDS awareness campaign neih a, uluk taka vil zui ni se, an ti a; mipui zirtir nan khawlai remchangah ualau takin inzirtirna lam hawi tam zawk tàr ni se an ti. District Community Resource Group din dan tur leh pawimawh dangte sawiho a ni bawk.