ZPM-in chhiatna tuarte an tawrhpui

Rorel lai ZPM party president Lalliansawta chuan nimina chhiatna thleng chungchangah thuchhuah siamin, Mizoram hmun hrang hranga chhiatna nasa tak thleng chu ZPM General Headquarters-in pawi an tih thu leh chhiatnaa thite an tawrhpui thu a tarlang.

Lalliansawta chuan, thlipui tleh leh ruahsurin hmun hrang hrangah chhiatna a thlen leh mi eng emaw zat an thi chu ZPM-in pawi an tih thu sawiin, "In leh lo, ran vulh leh nunna hial chán kan awm hi rilru a na a, thinlung takin kan tawrhpui a ni. Leimin vangin khaw kar kawng hmun hrang hrangah a ping a, veng ṭhenkhat thlànmualte pawh a chim tih kan hriatin pawi kan ti hle a ni," a ti.

ZPM President chuan, khuarèl chhiatna thlengah chief minister Lalduhoma bakah, minister leh MLA-te chhiatna thlenna hmunah chhiatna tuartute hnêm tura an che chhuak nghal chu thlamuanthlak an tih thu sawiin, "Sorkar aṭanga lusúnte ràlna sum hmahruai atan Rs 2,00,000 ṭheuh hlan nghal an ni hi lawmawm kan ti a, ràlna hnuhnung atan Rs 2,00,000 zel ruahmanna siamsak leh an ni hi mipui lainatna leh hmangaihna aṭanga chhuak niin kan hria," a ti a, sorkar hmalaknaah an lawm thu a sawi.

ZPM Ṭhalai pawhin thuchhuah siamin, "May 27, 2024 aṭanga Remal Cyclone thawkin a ken tel thli tleh leh ruah nasa taka sûr vanga Mizoram hmun hrang hranga chhiatna a thleng hi pawi kan ti a, mitthi chhungkuate leh harsatna tâwk hmun hrang hranga mite kan tawrhpuiin, pawi kan tih pui tak zet a ni," an ti.

Khuarel chhiatna vanga hrasatna tâwkte chhawmdawl tura sum leh pai bakah, thâ leh tui sénga theihtawp chhuaha thawktute chungah an lawm thu ZPM ṭhalaite chuan an tarlang a, "Harsatna tâwkte chhawmdawlna tura Mizoram sorkarin cheng vbc. 15 a ruahman bakah, mitthite ex-gratia Rs 4,00,000 pek tura ruahmanna a siam nghal hi thlamuanthlak kan ti hle," an ti a; Chief Minister chu khua leh tuite tana thlamuanpuiawm tak a nih thu an tarlang.