April 2024 chhungin lirthei 2,537 ziak lut
Sorkar kum 2024-25 kal mekah Transport department chuan April 2024 chhung khan lirthei chi hrang hrang 2,537 an ziak lut. Mizoramah lirthei ziah luh tawh 3,12,369 niin, chu'ng zinga 2,12,888 chu two wheeler a ni.
Transport department-in April 2024 thlenga lirthei an ziah luh tawh zat an tarlan danin, April 2023 aṭanga March 2024 chhung khan lirthei 3,09,832 an ziak lut. Sorkar kum thar kal mekah April 31 thleng khan lirthei 3,12,369 ziah luh tawh a ni a, March 31, 2024 aṭanga a punna chu 2,537 a ni.
Sorkar kum kal meka lirthei ziah luh thar 2,537 zingah two wheeler 1,796 awmin a tam ber a, lirthei ziah luh zawng zawng aṭangin 70.79% a tling. Car 428, bungraw phur (goods carrier) 193, two wheeler taxi 69, auto-rickshaw 24 leh taxi parukte chu ziah luh thar zinga tam zual an ni.
Mizorama sorkarin lirthei a ziah luh tawh zawng zawng 3,12,369 zinga 2,12,888 chu two wheeler niin a tam ber a, 68.15% a ni. Car 52,811 ziah luh tawh niin, ziah luh tawh zawng zawng aṭangin 16.91% a ni a, lirthei ziah luh tam ber leh a dawttu inthlauhna hi 1,60,077 a tling.
Mihring phur chi sumdawnna lirthei zingah auto-rickshaw 6,315, taxi 5,887, two wheeler taxi 4,095, maxicab 2,401 leh bus 596 ziah luh a ni tawh a; kumin April thla chhung bika ziah luh thar zingah - two wheeler taxi 69, auto-rickshaw 24, taxi paruk, maxicab pakhat leh bus pakhat a tel.