KHAWTHLIR

Chawlh puang

Mizoram sorkar chuan Indian Meteorological department thuràwn angin, Cyclone Remal avangin vawiin May 29 hi chawlhah a puang a, state sorkar pisa, sikulte leh public sector undertakings-te chawlh tur a ni. DMR, Health, Police, Power & Electricity, PHE, PWD leh Transport department-te, district administration, municipality leh treasury-te erawh chu inring reng tura tih an ni. Sor­kar chuan nimin kha chawlh­ah a lo puang tawh.

Kolasib-ah chhiatna thleng sawiho

Kolasib DC John LT Sanga hoin nimin khan a pisaah sorkar hotute'n thli tleh leh ruahsur nasa vanga chhiatna thlenga chhanchhuah leh chhawmdawl hna thawh vat theih dan tur an sawiho. Bawrhsap ho hian chhiatna thlenna hmun hrang hrang an tlawh a, a ṭul dan azirin chhawmdawlna hna thawh nghal a ni.

Exam hun sawn

Nimina thli tleh leh ruah­sur vanga harsatna thleng avangin May 28-29, 2024-a neih tur casual teacher exam hun siam rem a ni a, vawiin leh naktukah exam zawk tur a ni.

Chhawmdawlna pe

Mizoram Information Service Association chuan nimin khan chief minister Lalduhoma chu a chenna CM Bangla-ah an hmu a, Chief Minister's Relief Fund-ah Rs 20,000 an chhûng lut.

Ei leh in tur pe

Tun hnai ruahsurah Manipur panna kawng laih mek chu a diak nâl hle a, Pawlrang-Manipur inkarah lirthei eng emaw zat a tangkhang a, kawng laka tangkhangte chu YMA, Pawlrang Branch chuan nimin khan ei leh in tur an sem. Kawng laih thar avangin lirthei a tangkhang nasa a, ṭhenkhat chu zankhuain rampalailéngah an táng nia thu dawn a ni.

MP-in ngen

Rajya Sabha MP K Vanlalvena chuan nimin khan Election Commission of India hnenah lehkhathawnin, Lok Sabha inthlanah Mizoram Armed Police mi 1,047-te tun thlenga vote thlaktir loha an la awm chu an dikna chanvo hupbeh sakna a nih thu tarlangin, vote an thlak ngei theihna tur ngaihtuah nawn leh turin a ngen.