Leiminin a chhilh lak chhuah belh; Mi 27 ruang lak chhuah a ni tawh

Mizoram hmun hrang hranga May 28, Thawhlehnia leminin in leh thlám a hnâwl avanga thi zinga mi 27 ruang lak chhuah a ni tawh. Nimin bikah tlai dar 6 thleng khan ruang pathum lak chhuah belh a ni a, lak chhuah loh mi pasarih an la awm.

Thawhlehnia chhiatna thlengah hian mi 40 vel an thia hriat a ni a, chu'ng zinga mi 27 chu lak chhuah tawh niin, mi pariat lak chhuah loh an la awma hriat a ni. Melthuma chhiatna thleng bikah, hnam dang thi zat hriat chian a nih loh avangin mitthi zat leh ruang la hmuh loh zat dik tak hriat theih a la ni lo.

Chhiatna thlengah hian May 28 khan mi 24 ruang hmuha lak chhuah hman a ni a, nimin khan tlai dar 6 thlengin mi pathum ruang lak chhuah leh a ni.

MELTHUM

Chhiatna thlenga mitthi tamna ber Melthumah chuan nimin chhun khan Gloria MS Dawngliani (14) ruang lâk chhuah a ni a, Thawhlehnia lak chhuah tawhte nen ruang 15 lâk chhuah a ni tawh a, lak chhuah loh Mizo pali an la awm.

Hnam dangte chuan an hnamdang puite lak chhuah kim an nih tawh thu ruang zawngtute an hrilh.

Melthumah hian khawtual mi bakah Central Disaster Response Team, National Disaster Response Force, Fire & Emergency Services, Central YMA hnuaia Disaster Respond Team leh CYMA-in hnatlang tura a ruat YMA branch-te an hnatlang a, ruang an zawng a ni.

HLIMEN

Nimin khan Hlimenah hnam dang pakhat ruang lak chhuah belh a ni a, nimin piaha lak chhuah mi pali nen, mi panga ruang lak chhuah a ni tawh. Hnam dang pakhat ruang lak chhuah loh a la awm.

Hlimenah hian niminah khan khawtual mi bakah 1st Bn. MAP leh Central YMA-in hnatlang tura a ruat YMA branch member-te an hnatlang.

FALKAWN

Falkawnah chuan nimin chhun khan nimin piaha ruang hmuh zawh loh hmu chhuakin lak chhuah a ni.

Falkawna leminin chenna in a hnawlah hian mi pali an cheng a, pahnih chu hliamna lutuk tuar loin an in sa seng thei. Hmangaihzuali (60) leh Lalthanzama (68) te chu leimin hian a chhilh.

Lalthanzama ruang chu nimin piah khan hmuh niin, Hmangaihzuali ruang chu nimin chhun khan lak chhuah a ni. 3rd Bn. MAP-te'n Falkawn khawtlang ruang zawnnaah hian an pui.

AIBAWK

Aibawkah hian leiminin Matthew Lalchhanhima (34)-te chenna in a chimpui a, Matthew Lalchhanhima leh a nupui Vanlalruali (34)-te chimpuiin, zawn zui nghal a ni a, nimin tlai dar 6 thleng khan hmuh an la ni lo.

Thu dawn danin, in chim lai hian Matthew Lalchhanhima te nupa hi an in chhâwng hnuai zawkah an awm a, an fate pahnih kum 9 leh kum 14 mi chu in chungah an awm thung a; an fate hi chu an insaseng hman a ni.

Ruang zawnnaa Aibawk khaw­tlang pui turin 5th IR leh Aizawl DC hnuaia Quick Response Team-te ruat an ni a, mahse, khaw kar kawng leimin avangin an kal thei lo nia hriat a ni.