RUANG ZÂWN

 May 28, Thawhlehni zing dar 9:30 vela Lungsei (Samlukhai bul) rama leiminin thlâm a hnâwla thi Lalrimawii (63) w/o Lalthangfala, Maubawk, Aizawl ruang chu hmun eng emaw zatah kawng a pin avangin hlânga zâwnin Aizawl thlenpui a ni.

Lalrimawii ruang hi Aizawl aṭanga km. 64-a hla Sialsuk aṭangin Thawhlehni zan dar 6:30 velah chhuahpui niin, Aizawl pan a ni a, hmun tam takah Aizawl-Lunglei World Bank Road a pin avangin lirtheia phurh theih a ni lo a, mi tlawmngaite'n hlânga zâwnin Aizawl an panpui. YMA, Hmuifangtlang group leh Chhimphei group chhunga YMA branch member-te'n an huam chhungah an inhlàn chhâwng zel a; kawngpui pangngai ni lo, tláng kawngahte a cháng chuan kalpui a ngai ṭhin. Thawhlehni zan zankhuaa an zâwn bakah, nimin nilénga an zâwn hnuah nimin tlai dar 4 khan Aizawl thlenpui a ni a, damdawi-ina ruang endik a nih hnuah vui a ni. 

Maubawk Branch YMA chuan, Lalrimawii ruang buaipuitu leh zâwntu zawng zawng chungah an lawm thu an tarlang.

Hmuifangtlang leh Chhimphei group YMA-te hian Thawhlehni zan vêk khan Chhiahtlang khaw pa damlo pakhat, Serchhip damdawi-in aṭanga State Referral Hospital-a thawn (refer) chu hlânga zâwnin Falkawn an panpui a, zankhuaa an zâwn hnuah nimin zing dar 5 vel khan damdawi-in an thlenpui a ni.