Chhiatnaa thite sorkarin ràlna hlàn

Disaster Management & Rehabilitation (DMR) minister K Sapdanga chuan Aizawl hmun hrang hranga leimin vanga thite sorkarin a ràlna hmahruai Rs 2,00,000 nimin khan a hlan.

DMR Minister hian May 28, Thawhlehnia leiminin a hnâwla thi chhungte nimin khan a tlawh kual a, sorkar aṭanga ralna a hlan a ni. Minister of state pahnih B Lalchhanzova leh Lalnghinglova Hmar bakah, MLA Lalmuanpuia Punte-te'n an ṭawiawm.

K Sapdanga chuan, "Cyclone Remal vangin Zoramin lú kan sún a, rilru a náin pawi kan ti tak zet a, thinlung takin kan tuar tlang niin ka hria," a ti a; sorkar dan awm sa angin mitthite chu Rs 4,00,000 zela ràl tur a nih thu sawiin, "Tunah hian Rs 2,00,000 ṭheuh kan han hlan phawt a, hun remchang hmasa berah ràlna thawh hnihna Rs 2,00,000 dang hlan leh a ni ang," a ti.

DMR Minister chuan, Salem Venga mitthi, Lalṭanpuia te chu an chhungkuaa an thih vek avangin ràlna pawisa tu hnena pek tur nge tih an hriat mai loh avangin Salem Veng Local Council leh YMA hruaitute hnenah an hlân tih a sawi.

Chhiattawh nikhuaa Zo nun ze mawi lantir a ni ṭhin chu ropui a tih thu sawiin K Sapdanga chuan, "Tlawmngai pawlte inpekna leh kohhran leh khawtlang hruaitute bakah, mimal tlawmngaite chhiat tâwkte ṭanpui tura kan thawk chhuak nghal ṭhin hi a Kristian hle. Sorkar lama concern department-te hmalakna leh thawhrimna a chhuanawm a, a thlamuan­thlak hle a ni," a ti.