CM leh MJA hruaitute inkâwm

Chief minister Lalduhoma leh Mizoram Journalists' Association (MJS) General Headquarters office bearer-te nimin khan CM pisaah an inkâwm a, Mizoram media leh chanchinbumite kaihhnawih thil chi hrang hrang an sawiho.

MJA president C Lalrambuatsaiha chuan, kumin March thlaa MJA General Conference-a an rorel zinga sorkara thlen tur chi thilte CM hnenah a thlen. CM Lalduhoma chuan, MJA hruaitute thu thlente chu a theih ang anga a bawhzui dawn thu a lo hrilh.

MJA hruaitute chuan, Advertisement Rules hman lai chu ennawn tur leh, mumal zawka advertisement kalpui a nih theih nan sorkar budget thar awm leh turah chuan department hrang hrangah publicity/advertisement atan sum dah tawh lo a, IPR department-ah a hlâwma dah turin an ngen. Classified advertisement rate hman mek Rs 130 chu Rs 150 aia hniam loa tisang turin an ngen bawk. Heng rawtnaahte hian CM chuan a hranin ziaka thlen leh turin a lo chah a ni.

MJA hruaitute chuan Mizoram House leh sorkar guest house-a accredited journalist-te group-A officer anga enkawl an nih danah kalphung ṭha zawk tura an ngaih te, press enclave din dan tur te, Mizoram Journalists' Pension Scheme chungchang leh press tour buatsaih chungchangte an thlen bawk.