Chief Minister leh Excise hotute an inkawm; Kum 2024-ah ruihhlo vangin mi 32 thi tawh

Chief minister Lalduhoma chuan nimin khan a pisaah Excise & Narcotics department (END) hotute kâwmin, department hmalakna leh dinhmun a sawipui. END hotute chuan, kuminah ruihhlo vangin mi 32 an thih tawh thu an tarlang.

Inkawmnnaa END hotute sawi danin, Kumin 2024-ah nimin thleng khan Mizoramah ruihhlo vangin mi 32 an thi tawh a, mipa 25 leh hmeichhia pasarih an ni. Kum 1984 aṭanga nimin thlengin END-in ruihhlo vanga thi mi 1,842 an chhinchhiah tawh a, mipa 1,616 leh hmeichhia 226 an ni. Zu vanga thi zat erawh mumal taka chhinchhiah a harsat thu an sawi.

CM Lalduhoma chuan, Mizoram Ruihhlo Do Core Committee ṭhukhawmin ruihhlo lut titlem tura hmalakna chu END kutah a dah thu a sawi a, "In hna a tam phah dawn a, mamawh pawh in nei dawn a, sum leh pai pawh in mamawh dawn. Chuvang chuan vawiinah in dinhmun leh hmachhawpte hriat kan duh a ni," a ti.

Sorkar hmalakna puitling zo ta lo sawi tur a awm nual tih sawiin Lalduhoma chuan, "Hmalakna inthuah leh inhnai lutukte a lo awm thei a, sum leh pai tam tak sorkarin a séng si a, chutiang chu tihbo kan duh. Department tin hian an project duante chu Planning Board kaltlang zela thehluh tawh tur kan ti," a ti a; END ruahmannate pawh thehlut tur leh a ṭul anga an lo zir chian tur thu a sawi.

Inkawmnaah hian END commissioner Z Lalhmangaiha leh joint commissioner Peter Zohmingthanga ten department hmalakna leh hmachhawpte an sawi bawk.

Chief Minister hi secretary to chief minister Vanlaldina Fanai leh OSD R Lalrodingi ten an ṭawiawm a ni.