Minister-in tuia harsatna a sawifiah

Public Health Engineering (PHE) minister Prof. Lalnilawma chuan tun hnaia ruahsur nasa leh thli tleh vanga tui pump leh sema PHE department-in harsatna a tawhte nimin khan a pisaah MJA hruaitute a hrilhfiah. Harsatna hrang hrang vangin PHE-in tui an sem thei rih dawn lo a, tui renchem tur leh ruahtui khawl turin mipui a chah.

PHE Minister hian nimin khan a pisaah MJA hruaitute a kâwm a, PHE department hotute'n an ṭawiawm. Minister chuan, tun hnaia ruahsur nasa leh Tlawng lui lianin Aizawl châwmtu tui lakna Greater Aizawl Water Supply Scheme (GAWSS) Phase-I khawl ṭhenkhat a chîm a, thil awm dan May 28, Thawhlehni chawhnu khan a hmunah a enfiah nghal thu a sawi.

Prof. Lalnilawma chuan, an rin phâk bâkin tuilianin hasratna a thlen tih sawiin, "Tui a kàm deuh hnuah pawh chirh leh bawlhhlawhin a tihbuai nasat avangin then fai chhung a rei dawn a, mumal taka tui kan sem leh theih nan thla tél pawh hun kan mamawh mai thei," a ti.

PHE Minister chuan, tui pump-na khawlte a chhiat leh chhiat loh enfiah a ngai dawn tih sawiin, "Khawl a chhia a nih phei chuan sum tam tak sénga siamṭhat a ngai dawn a, nizan (Thawhlehni zan) khan Chief Minister hnenah thil awm dan kan thlen nghal," a ti a, sum pawh an mamawh nual theih thu a hrilh tih a sawi.

PHE hotute sawi danin, May 28-a Tlawng lui lianin GAWSS Phase-I pump house a tichim. A hmaa Tlawng lui len ber ṭum chu June 13, 2017 a ni a, kum 2017-a tuilian aiin May 28, 2024-a tuilianin metre 1.5-in a chîm sang zawk.

PHE HOTUTE TARLAN

• Tlawng lui aṭanga tui pump chhuahna Raw Water Pump House bakah, tui thlit fìmna Clear Water Pump House thlengin tuilianin a chîm a, tuilianin khawl a tihbuai dan tak hriat a la ni lo a, kháwl a ro hnuah thil awm dan hriat chian theih a ni ang.

• Tlawng lianin GAWSS Phase-II khawlte chîm ve lo mah se, kawlphetha pekna line a chhiat avangin tui pump theih a ni lo.

• GAWSS Phase II bika hman tur diesel generator thar an neih sa hmanga tui pump dan an ngaihtuah a, nizan khan tui pump ṭan theih an tum. A hlawhtlin pawhin ni khatah tui litre nuai 80 vel bak pump theih a ni dawn lo a, Aizawla tui harsatna a sukiang pha dawn lo.

• Ni khata tui litre nuai 370 pump theihna tura ruahman GAWSS Phase-III pawh tuilianin a chîm a, tui pump theih a ni rih lo.

• Tlawng tuilianin khawl a tihbuai bakah, nasa takin tui a nú. Tui nut zawng tehna NTU 5 chu mihring in tlaka thlit fìm theiha ngaih a nih laiin, May 28-a tui nut zawng chu NTU 900 chung lam a ni

• Tuilianin Mizoram hmun hrang hrangah harsatna a thlen.

• Saitual châwm tura Tuivawl tui laknaah kum tin tuilian vangin harsatna a thleng a, May 28, 2024-ah pawh transformer a chîm. Transformer a ro phawt loh chuan tui pump theih a ni dawn lo.

• Lawngtlai châwmtu tui lakna sub-mersible pump tuilianin a lâk avangin nimin zing khan senghawi a ni a, tui pump theih a ni rih lo.

• Hnahthial tui lakna pawh fimkhur thilah khawl senghawi a ni.

• Serchhip tui pump-na pawh kawlphetha pekna a chhiat avangin pump theih a ni rih lo.