Bairabi-ah chhungkaw 21 sawn chhuak

Kolasib district bawrhsap John LT Sanga chuan nimin khan tun hnaia ruahsur nasa vanga Tlawng lui lianin Bairabi khuaa hmun ṭhenkhata harsatna a thlente a hmunah a enfiah. Tlawng lui lian vang hian Bairabi khuaa chhungkaw 21 chu hmun himah sawn chhuah an ni.

Bawrhsap chuan, chhiatna a thlen chánga a ṭul apianga che chhuak ṭhin khawtlang hruaitute leh tlawmngai pawlte chu mipuiin an thlamuanpui thu sawiin, "Sorkar hmalaknaa chhanchhuah, ṭanpui leh chhawmdawl hna tihlawhtlingtute leh tichaktute an ni," a ti a; mamawh zual phuhrûk nan pawisa leh tarpauline eng emaw zat khawtlang hruaitute hnenah a hlan.

Bairabi khawtlang hruaitute tarlan danin, Tlawng lui lian vang hian May 28, Thawhlehni zan thleng khan chhungkaw 21 chu hmun him lamah sawn chhuah an ni tawh a, tuilianin lawngte a lâk bo loh nan tlaivarin vengtu an indah. Tlawng lui hi kum 1989, 2008, 2017 leh 2018-ahte nasa takin a lian tawh a ni.