Thil chhiate siamṭhat dan tur sawiho

Serchhip district bawrhsap David Lalthantluanga hoin nimin khan DC meeting hall-ah Cyclone Remal vanga chhiatna thlengte siamṭhat dan tur sawiho a ni a; PHE, PWD leh PE department hotu te, zonal officer te, DC pisaa officer-te leh NHIDCL hotute an tel.

Cyclone Remal-in Serchhip district-a a tihchhiat report lak khawm chinah in 14 a chhia a, chu'ng zinga pasarih chu luah tlâk tawh loh (fully damage) a ni. Sorkar inkaihhruaina zûlzuiin zonal officer-te'n ṭanpuina an pe chhuak mek. Serchhip district-a leiminin kawng a hnawhte then fai mek a ni a, ni hnih chhungin lirthei paltlang theih tura peih vek theih beisei a ni.

Kawlphetha chungchangah Serchhip district châwmtu Zuangtui - Bukpui 132KV line leh Lunglei via Melriat line a chhia a; Khawzawl via Saitual line, East Lungdar sub-station aṭangin kawlphetha lak luh mek a ni. Zuangtui line pawh nimin lamah siamṭhat hman beisei a ni.

Serchhip châwmtu tui semna - transmission line leh IOC booster pump-te chu thlipuiin a tichhia a, PHE department-in an siam mek a, kalphung pangngaia kal leh turin chawlhkar hnih vel an mamawh dawn.