Vawk/vawksa lak luh khap a ni

Mizoram sorkar chuan, African Swine Fever (ASF) a lèn mek avangin Mizoram páwn aṭanga vawk, vawksa, vawksa aṭanga thil siamte lak luh a khap.

Disaster Management & Rehabilitation (DMR) department chuan May 24, 2024 khan vawk, vawksa leh a kaihhnawihte lak luh khapna thupek a tichhuak a, "Mizoram páwn leh India ram páwn aṭanga vawk, frozen vawksa leh vawksa aṭanga thil siam chhuahte lak luh khap bur a ni," a ti.

DMR department thupekah chuan AH&Vety department chu hri léng chungchangah leh ASF vanga vawk thite thehthang danah 'National Action Plan for Control, Containment and Eradication of ASF' angin chak taka hma la tura tih a ni.

Mizoram Pig Farmer’s Association (MIPFA) chuan thuchhuah siamin, Mizoram sorkarin state páwn aṭanga vawk, vawksa leh vawksa aṭanga thil siamte Mizorama lak luh khapna a tichhuak chu lawmawm an tih thu an tarlang.

MIPFA chuan, "Kan harsatna leh kan mangannaahte min natpuitu AH&Vety minister Pu C Lalsawivunga kan nei hi kan thla a muang tak zet. Khapna thupek hi khauh zawka kenkawh leh vil zui a nih theih nan theihtawp chhuah a inhuam thu min hrilhtu Chief Secreatary chungah pawh kan lawm," an ti.

Chief Minister leh AH&Vety Minister hnena African Swine Fever léng leh a kaihhnawih harsatna an thlente ṭha taka an lo ngaihthlaksak a, hma an lak nghal avangin an lawm thu an tarlang bawk.