Khawzawl dist-a cheng zingah HIV/AIDS vei 2.13% an awm

Khawzawl District AIDS Control and Prevention Committee chu nimin khan an chairman K Lalrohlua, bawrhsap hoin DC meeting hall-ah an ṭhukhawm a; Khawzawl district-a HIV/AIDS vei zat chu district mipui zat aṭanga chhûtin 2.13% a nih thu tarlan a ni.

Ṭhutkhawma tarlan danin, Khawzawl district-ah HIV vei mi 616 hmuh chhuah a ni tawh a, chu chu district pumpuia mihring cheng zat aṭangin chhûtin 2.13% a tling.

K Lalrohlua chuan, HIV/AIDS chu lang lo lama ram leh hnam ei chhe theitu a nih avangin fimkhur a ṭul thu a sawi a, "HIV/AIDS a darh zel lohna turin inzirtirna ṭha a pawimawh a, sakhaw rawngbawltute uar zawka zirtirna kalpui turin ka ngen a ni," a ti.

Bawrhsap chuan, District Narco Coordination Center-in ruihhlo chungchang inzirtirna an neihnaah HIV/AIDS chungchang zirtirna kalpui thei se ṭhaa a hriat thu leh social media kaltlanga campaign neih tam a pawimawh thu a sawi bawk.

Meeting-ah hian sorkar department aiawhte, khawtlang, tlawmngai pawl leh kohhran hruaitute an tel a; HIV/AIDS chungchang inzirtirna ngawrh zawka neih dan tur te, District Community Resource Group din dan tur te, naupang leh tleirawlte hnena zirtirna pek dan turte sawiho a ni.