KHAWTHLIR

TKP-in thisen pe

ṬKP, Kolasib Bial chuan nimin khan BCM, Kolasib Venglai kohhran hall-ah thisen unit 39 an pe a, petute mipa 29 leh hmeichhia 10 an ni.

CM Relief Fund

Nimin khan pawl hrang hrang hruaitute'n chief minister Lalduhoma an hmu a, Chief Minister’s Relief Fund atan pawisa an hlan hlawm. CMRF atana pawisa thawhtute chu - Mizoram Civil Service Association-in Rs 50,000, Chase Academy-in Rs 50,000, Mizoram Government School Teacher's Union-in Rs 30,000, Central Bank of India, Aizawl Branch-in Rs 10,000 leh Special Educator Association-in Rs 5,000-te a ni.

AR-in heroin man

Assam Rifles sipaite chuan May 28, Thawhlehni khan Tuivai leia lirthei an endiknaah heroin (no. 4) gram 22 an man a, Rs 15,40,000 vel hû a ni. Heroin kengtu Pauminlal s/o Paulenmang, Lamka Simveng, Churachandpur, Manipur an man tel nghal a, Ngopa police-te hnenah an hlàn.