Sumdawng lirtheite'n nawrh an titâwp

Commercial Vehicles Joint Action Committee (CVJAC) chuan an thil phût nawr nana May 18, 2016 aṭanga tiam chin awm loa nawrh an huaihawt avanga sumdawng lirtheite ni li chhung an tlân loh hnuah May 21, 2016 tlai khan an titawp lailâwk a, Inrinni zan aṭang khan sumdawnna lirtheite an tlan leh ṭan.

CVJAC nawrhna chung-chang-ah hian Inrinni chawhma khan Central YMA chu ṭhu-khawmin, palai hna thawh an rel a; Inrinni vêk khan Home minister R Lalzirliana, chief secretary Lalmalsawma leh CVJAC hruaitute an kâwm. CYMA hruaitute hriatpuinain CVJAC hruaitute chu HM R Lalzirliana inah sorkar hotute nen an inbe leh a ni.

CVJAC nawrhna avanga mipuiin harsatna lian tham an tawh loh nan sorkar chuan hma a la a; Inrinni zing khan Kolasib DC-in Cr.PC Section 144 tlawhchanin mipui himna atan hmun khatah mi panga aia tam awm khawm khapna thupek leh Rengtekawn leh Vairengte dáia ni tin mamawh phur motor-te chu chhuahtirna tur thupek a chhuah.

Kolasib Magistrate leh police-te venna hnuaia lirtheite chhuahtir an nih dawn lai hian Rengtekawnah CVJAC duty-te'n phal loin dan an tum a, dan tumtu mi 30 chu police-te'n an man a; tlai dar 4 velah chhuah leh an ni.

Rengtekawna lirthei tang-khang 170 vel chu an kalna tur hmun lam panin an chhuak ta a; Aizawl lam pan lirthei 90 vel chu police venna hnuaiah an chhuak a, Assam lam pan tur lirthei 60 vel an chhuak. Lailapur-a táng truck 300 vel pawh chhun dar 12-ah Mizoram panin an chhuak thei a, chawhnu dar 2 velah lirthei 180 velin Vairengte Police checkgate an paltlang.

Nawrhna tihtawp hma hian sorkar chuan thuchhuah siamin, mipuite tana hna thawk tura permit pek lirthei neitute'n permit pek an nih anga an lirthei hmang lo a, mipui harsatna siam zawnga an nawrh avangin an permit-te suspend mai ni lo, tihtawp (cancel) thlenga hrem an nih tur thu a tarlang.

Sorkar thuchhuah chuan, mipui harsatna sutkian nan sorkar department lirtheite leh private motor remchang apiang tlantir a nih tur thu leh, sorkar ruahmanna dodal leh tibuai an awm chuan an chungah dan anga hremna lek a nih tur thu a puang tel a ni.

Inrinnia Home Minister ina MLA leh political party hruaitute
ṭhutkhawmnaah, nuar mekte'n sorkar thupek zâwm loa an nawrh zel chuan mipui hmakhua ngaihtuahna vangin The Mizoram Essential Services Maintenance Act 1990 hman mai an lo rel tawh a ni.

Sorkar thuchhuah tarlan danin, CVJAC thil phût, lifetime road tax pek dan tur chu ṭum thuma pek theih tura siamṭhat mek a ni a, mahse, vawi leh khata chinfel mai chi a ni lo. City bus chuan man tihsan, auto-rickshaw kawngkhar dinglam hawn theiha siam, By-pass road paltlang Bawngkawna truck tlan luh theih loh hun siam hlih tihte chu nawrh phahna atana hmang loin, a ṭul dan ang zela ennawn theih a ni.

Inrinni tlai khan CVJAC chuan thuchhuah siamin, CYMA hmalakna hnuaiah sorkar hotute nen an inbiak thu an tarlang a; Home Minister-in CYMA palaite hriatpuiin, thil lawmawm an tihsak dawn angin a lo hrilh nia sawiin, "A bak harsatna kan neihte pawh sawiho zel tur a nih thu kalkhawmte hnena a sawi avangin lungawi lohna lantir kalpui mek chu tihtawp remtih nghal a ni. Sorkarin kan harsatna min chinfelsak a tum avangin lawmthu kan sawi nghal," an ti.

CVJAC tarlan danin, life-time tax chu instalment-a pek theih turin tihhlawhtlin mek a ni a, auto-rickshaw kawngkhar dinglam hawn chungchang chu DTO-te'n hriatthiamna nei tura hma lak an remti. Aizawla truck-te luh phal loh hun siam chu Traffic lamte nen enho tura tih a ni a; harsatna dangte pawh a tahtawla hmalak tura tih a ni.

Nawrh chhungin CVJAC duty-te hmun tam takah an che mawi loa sawi a awm a; Mission Veng Local Council chuan May 20-a Sikulpuikawna duty-te chet mawi loh vangin May 21 zing khan Mission Veng chhunga CVJAC-te duty-na hmun pahnih, Sikulpuikawn leh Mission Veng Bazar-ah kalin, Mission Veng chhungah hawihhâwm taka duty tur leh, private motor-in mi dang an phur tur tibuai lo turin an hriattir a ni.