Leiminin mi pahnih a delh hlum

Inrinni zan dar 6:40 vel khan Zonuam, Aizawlah leiminin in a delh a; mi pahnih thiin, mi dang pakhat a hliam.

Zonuam khawtlang hruaitute hnen aṭanga thu dawn danin, leimin hian Rualthankhuma in a delh a; In chhawng hnuai zawk luahtu Lalthlengliani (40) leh a fanu Lalhmangaihzuali (13), pawl 8 zirlaite chu an thi. Lalthlengliani hi a hmunah a thi a, Lalhmangaihzuali erawh chu damdawi-in thlenpui a nih hnuah a thi. In chhâwng chung zawka awm Kaplali (80) m/o Rualthankhuma pawh hliamin, damdawi-inah enkawl mek a ni.

Inrinni zan vek khan Zemabawka Aizawl-Lunglei road chu hmun hniha kawng chhak lam minin a hnawh ping. Thu dawn danin, tlai dar 6 velah nikum lama lei min tawhna hmun chu a min leh a, kawngpui a hnawh vek a, truck pakhat a chhilh.

Zan dar 10 velah city bus inherna hmun (turning point) zâwnah nasa takin kawng chhak lam a min bawk a; kawngpui a hnawh vek bakah, bus leh pick-up pakhat ve ve kawng thlangah a hnâwl liam a, pick-up dang pakhat leh in pakhat a chhilh bawk. Leiminte hi a tam tham avangin lirthei kaltlang theiha thenfai hun tur an sawi theih loh thu, PWD hotute chuan an sawi.

Leiminte hi nimin khan Disaster Manage-ment & Rehabilitation minister C Ngunlianchunga'n a tlawh. C Ngunlianchunga chuan, in sakna tur laih vanga leiminin mipui leh vantlang harsatna a siam ṭhin chu pawi a tih thu sawiin, "Fimkhur loh vangin chhiatna a thleng fo a, tun hnuah chuan mi tinte kan fimkhur lehzual a ṭha hle. In sakna tur hmun laih pawh hun bik neiin, ṭhâl laia tihfel vek theih ni se a duhawm hle," a ti.

Phunchawng leh Sairang inkarah pawh kawng chhak minin NH-54 a hnawh ping a, nimin khan PWD lamin lirthei kaltlang theihin an thianfai nghal. May 20 zinga Lawngtlai leh Saiha inkar, Chawnhû hnuaia leiminin NH-54 kawngpui a hnawh pin pawh Inrinni chhun dar 12 vel khan lirthei tê chi kaltlang theihin an thianfai bawk.