KHAWTHLIR

Thisen pe

Inrinni khan Aizawl Ci-vil Hospital tan Aibawk branch YMA chuan YMA Day pualin thisen unit 48 an pe a, a petute mipa 44 leh hmeichhia pali an ni a; Chaltlang North Branch YMA-in unit 38 an pe a, a petute mipa 35 leh hmeichhia pathum an ni. Dinthar Branch KṬP chuan Central KṬP blood donation calendar angin Synod Hospital tan thisen unit 30 an pe a, a petute mipa 29 leh hmeichhia pakhat an ni. Diltlang Bial ṬKP pawhin Lawngtlai District Hospital tan thisen unit 24 an pe a, a petute mipa 22 leh hmeichhia pahnih an ni.

Zirlai chawimawi

MZP headquarters, Lunglei chuan May 20, 2016 khan Saikuti Hall-ah Lunglei district-a zirlai ti ṭhate chawimawina hun an buatsaih a, Home minister R Lalzirliana'n a hmanpui. R Lalzirliana chuan, zirlai pawlte chu an hmalakna tur leh thil tih turah ngun taka ngaihtuah chunga kal turin a chah.

CBSE result

Central Board of Secondary Education (CBSE) chuan May 21, 2016 pawl 12 result a tichhuak a, Mizoram sorkar hnuaia CBSE affiliated school awmchhun MICE, Venghlui zirlai zingah Arts-ah 93.44% an pass a, Science-ah 71.11% an pass bawk. Teresa Vanmalsawmi d/o Zonunmawia, Mission Veng, Delhi Public School, RK Puram-a zir chuan 97.8% hmuin, mark 11-in topper a pha lo a; Sociology leh Psychology-ah full mark a hmu a ni.

Motor insû-ah thi

May 20, 2016 zan dar 7:30 vel khan Sialsuk leh Chamring inkar, Maufiangkawnah Maruti van leh Alto K-10 car an insû a, van khalhtu, Ali tia koh, Tlangnuam, Aizawla cheng chu a hmunah a thi. Alto car-a chuang hmeichhe pakhat a hliam a, State Referral Hospital-ah hruai a ni.

Hmanrua pe

Mara Autonomous District Council (MADC)-a Disaster Management & Rehabilitation department chuan May 20, 2016 khan Kawlchaw leh New latawh branch MTP-te hnenah Chhimtuipui luia tui tla zawnna atan leh rîkrum thila hman tur hmanrua a pe. Kawlchaw MTP hnenah life jacket panga, rafting board, search light pahnih an pe a; New Latawh MTP hnenah life jacket pali, rafting board, search light pahnih an pe a ni.