KMMTTP atan Revised Estimate-II siam Hna thawh zawh hun tur pawhsei a ni

Kaladan Multi Modal Transit Transport Project (KMMTTP) chu a ṭum hnihna atana revised estimate (RE) siam a ni a, hna thawh zawh hun tur pawh June 2019-ah pawhsei a ni.

KMMTTP hi May 20, 2016 khan MJA mem-ber-te'n an treasurer R Lalhmangaihzuala hoa tlawhin, hna thawh dan an en a, PWD hotute'n an kaihruai a ni.

MJA member-te hian kawng zau zawng leh blacktoping chhah zawngte an endik a; an endik chinah a nih tur ang ni pha lo a awm lo. Blacktoping chu metre 0.66 metre-a chah tur a ni a, MJA-te'n an endiknaah chuan 0.66 aiin a chah a, a zau zawng metre 17 tura tih pawh a tling vek a, metre 18-20 inkara zaute a ni hlawm.

He project atan hian a tirah cheng vbc. 575.65 ruahman a ni a, chu mi hnuah revised estimate vbc. 677.20 siam a ni a, a hnuah revised estimate-II cheng vbc. 1053.39 a siam leh a ni. RE-II hi sanction mek a ni a, package-I atan sanction hmuh tawh niin, package-II leh package-III atan pawh sanction hmuh thuai beisei a nih thu, KMMTTP enkawltu PWD hotute chuan thuthar thehdarhtute an hrilh.

KMMTTP hi Lawngtlai aṭanga Myanmar ramri thleng turin km. 99.83 tura ruahman a ni a, mahse RE-I hmanga kawng hnawh ngaite hnawhin, tlang tan ngaite an tan hnuah km. 90.82 tura tih leh a ni. RE-II hmang hian km. 87.18-ah pawh tawi leh a ni dawn.

PWD hotute sawi danin, KMMTTP atan hian cheng vbc. 1000 turin DPR siam a ni a, mahse vbc. 1000 hi Union Minister pawmpui ngai chin a nih avang leh Ministry lam an hmanhmawh avangin Ministry-a secretary pawmpui theih chin, vbc. 575.65-a estimate siam a ni. A tira estimate siam hi hna thawh zawhna daih a nih loh bakah, original DPR chu hmanhmawh taka siam a nih avangin a famkim tâwk lo a ni.

A tira estimate siam reh bun sa chu a quantity-te a zawh dawn avangin RE-I buaipui a ni a, department lama thawktute indaih lohna a nasat avangin junction improvement leh natio-nal highway atana thil pawimawh hrang hrang telh a ni lo.

February 18-20, 2015 chhung khan Ministry of Road Transport & Highway-a additional director general (ADG) leh hmarchhak bialtu regional officer (RO)-te chuan KMMTTP hi an tlawh a; RE-II siam turin PWD an hriattir avangin, November 2015 khan RE-II estimate chu Ministry-ah thawn a ni. RE-II bakah pawh hian thil man to zel avangin RE-III siam a la ngai dawn. Thil man to zel vang hian a tira ruahman lâwk loh cheng vbc. 60 vel company-te an pe tawh.

PWD hotute chuan, leimin ṭhin siamṭhatna tur pawh RE-II ah hian telh a la ni lo tih an sawi a, "Mithiamte'n an endik hnuah RE-III siam a ngai mai thei a, sorkar laipuiin engtin nge an tih dawn kan hre lo," a ti.

Zawhna chhangin PWD hotute chuan, "Compensation fel lo vangin hmun ṭhenkhatah contractor-te'n hna an thawk thei lo a, harsatna kan tawh phah. Tunah hian km. 1 kawng sawn a ngai dawn a, hetah hian compensation engzat nge pek a ngaih dawn kan hre lo," an ti a; zangnadawmna beisei, la pek si loh ṭhenkhatin hnathawktute an vau ṭhin tih an sawi.

Tun dinhmunah hian KMMTTP-ah hian km. 24 vel blacktop a ni tawh a, chung zinga km. 10 vel chu a nih tur ang metre 0.66-achhah a ni. Blacktop hma hian metre 0.55-a chahin lung phah tur a ni a, chumi chungah chuan metre 0.07-a chahin blacktop tur niin, a chungah 0.66-a chhahin blacktop leh tur a ni.

Kawng km. 87.18-a thui laih turah hian km. 81.96 laih zawh a ni tawh a, km. 69.86-ah lung phah tawh niin, km. 24-a thui blacktop a ni tawh. Lei pasarih dawh tur a ni a, hmun khatah hna ṭan a ni tawh. Lei dawhna atan hian company ruaiin design siamtir a ni a, chu chu cross check turin NIT, Guwahati-ah thawn a ni. NIT hian an thawn let hunah hna ṭan thuai beisei a nih thu PWD hotute chuan an sawi.

PWD hotute sawi danin, KMMTTP hi a tirah chuan May 2014-a zawh tura a ni a; mahse sanction tlai vang te, zangna-dawmna vang te, lei chungchang vang leh harsatna dang vangtein hun tiamah zawh theih a ni lo. Tun dinhmunah hna 66% vel thawh zawh tawh a ni a, June 2019 zo ngei turin company-te chu undertaking sign tir an ni.

KMMTTP hi package thumah ṭhen a ni a; package-I (km. 34.59) leh package-III (km. 26.81) chu RDS Project Ltd., New Delhi-in an thawk a, package-II (km. 25.78) chu Atlanta - ARSS (JV), New Delhi-in an thawk. Package-I leh II chu June 2018-ah zawh tur a ni a, package-III chu lei paruk dawh ngai a nih avangin June 2019-a zawh tura tih a ni.