ALS Director Manish Gautam-a'n IAS coaching centre a tlawh

Mizoram Youth Commission (MYC) nena Aizawla IAS coaching academy dintu, Alternative Learning System (ALS) director Manish Gautam chuan May 21, 2016 khan Dinthar-a IAS coaching centre an din chu a tlawh a, zirlaite nen an inkâwm.

Manish Gautam chuan, zirlaite dinhmun a hmun ngeia hmuh a duh avangin Aizawla coaching centre an din chu a tlawh tih sawiin, zirlaite'n zirna ṭha an neih thu leh phûrna nasa tak an neih thu a sawi a; "He centre hian IAS exam paltlang turin hmanrua leh bungrua a nei ṭha tawk a ni," a ti.

Gautam chuan, India ram puma ALS coaching centre-te'n test an neiha a ti ṭha zual 200 zingah Aizawla coaching centre-a zirlaite an tel tih a sawi a; kakkum aṭang chuan Aizawla coaching centre
aṭangin IAS an chhuah ngei a beisei thu a sawi bawk. ALS Director hi MYC under secretary Lalsawmzuala leh coaching centre coordinator H Van-lal-chhanchhuaha ten an lo dawngsawng.

MYC leh ALS hthawk dunin IAD coaching centre an dinah hian Mizo zirlai 60 an awm a, coaching kal mek chu thla 11 awh tur niin, zirlaite senso 75% chu MYC-in a tumsak a ni.

MYC hotute chuan, coaching centre-ah hian IAS coaching bakah Staff Selection Commission (SSC) coaching leh sipai laknaa physical test paltlang tawhte tan written exam coaching an pek tel thu an sawi a; SSC bikah hian zirlai 160-in coaching an kal mek. SSC coaching hi thla thum awh niin, July 2016 hian selection exam kaltlanga zirlai batch thar lak a ni dawn a, seat pawh 200-a tihpun tum a ni.