Kawng ṭha neih vangin lawmthu sawi

Mizoram University (MZU) panna kawnga awm veng pariata YMA branch intélkhawm, MZU Road Joint YMA Committee chuan May 20, 2016 khan Chawlhhmun community hall-ah kawngpui ṭha an neih avanga lawmthu sawina inkhawm an hmang a, UDPA minister Zodintluanga'n a hmanpui.

Zodintluanga chuan, MZU panna kawnga YMA branch YMA pariatin lawmthu sawina inkhawm an buatsaih chu lawmawm a tih thu sawiin, "Veng pariat YMA min sawm-na avangin ka lawm em em a, in veng kawng chhiatzia leh harsatzia kan hria a, Pathian leh mipui zarah kan hna hmasa ber Aizawl khawpui chhung siamṭhat a ni," a ti.

UDPA Minister chuan, UDPA department hnuaia sum hmuhna, JNNURM aṭanga sum hmuh first instalment a zawh dawn hnaiah kawng siam mek chu nasa takin a khû a, chungte chu veng pariatte chuan an tuar chhuak tih sawiin, chief minister Lal Thanhawla zarah Vaivakawn-MZU kawng siam hna chu harsatna hrang hrang karah zawh a nih thu a sawi. Kawngpui ṭha neihna tura veng pariat YMA-te hmalakna fakawm a tih thu a sawi bawk.

MZU Road Joint YMA Commi-ttee-ah hian Chawlhhmun, Tuivamit, Tanhril, Tanhril Vengthar, Central Jail Veng, Sakawrtuichhun, Zonuam leh Luangmual branch YMA-te an tel.

Kum 2012 khan UDPA hnuaia JNNURM kaltlangin project pathum kalpui a ni a; chungte chu - Aizawl khawpui chhung kawngpui siam cheng nuai 3873.40, Vaivakawn-MZU kawng siam nan nuai 1907.64 leh Sihhmui-MZU kawng siam nan nuai 5309.32-te a ni.