Rúl túr thahna nei turin hma la mek

Health secretary Lalrinliana Fanai chuan, tun hnaia Health minister Lal Thanzara'n rûl chuk damdawi, anti venom lei tura a tih chu an bawh-zui nghal a, circular an chhuah tawh thu Vanglaini a hrilh.

Lalrinliana Fanai chuan, anti venom chu tun aia ngaihsak leh zual tur te, thingtlang damdawi-in (PHC) zawng zawngah awm vek tura an duh thu leh, duhthusamah chuan Health sub-centre zawng zawng pawhin kawl se an duh thu a sawi a, "Anti venom hi RKS sum aṭanga lei tur a ni a, damdawi-inte'n an indaih loh chuan National Health Mission sum
aṭanga lei a ni ang. Sub-centre zawng zawnga dah erawh a harsa mai thei," a ti.

Health Secretary chuan, anti venom neih chu department-in an ngai pawimawh tih sawiin, Health department-a director-te chu anti venom leia bawhzui nghal tura hriattir an nih thu a sawi a; damdawi-in zingah anti venom nei lo an awm palh chuan damdawi-in lian zawkte nen hmalakho a, ngaihven tura hriattir an nih thu a sawi bawk.

Fûr laiin rûl a tam
ṭhin avangin rûl chuk laka mipui an him theih nan Health Minister chuan damdawi-in tinah rûl tûr thahna a tam thei ang lei turin Health department a hriatir a ni.