Vantlang bawlhhlawh bâwm sem

Indian Oil Corporation Ltd. (IOC)-in corporate social responsibility (CSR) aṭanga vantlang bawlhhlawh báwm, Aizawl khawpui veng tina hûn tura an lei chu Inrinni khan Lal Thanhawla Auditorium-ah UDPA minister Zodintluanga'n Aizawl khawpuia local council-te hnenah a hlan.

Bawlhhlawh bâwm inhlanna inkhawm hi UDPA secretary Dr C Vanlalramsanga'n a kaihruai a; Zodintluanga chuan, sorkar laipuiin thianghlimna kawnga hma a lak hma aṭangin Mizoram sorkarin nasa takin hma a la tih sawiin, "Aizawl khawpui hi India rama khawpui fai bera siam tumin hma a la mek zel a ni," a ti.

Zodintluanga chuan, "Mahni vêng vawngfai tura ṭhahnemngai em em, mahse, veng danga faina ngai pawimawh tawk lo kan la awm avangin mipui paltlang nasatna vengah bawlhhlawh a tam bik ṭhin. Veng dang tihbawlhhlawh kan hreh lohna hi sim a ngai," a ti a; local council-te chu an veng ṭheuh vawn fai kawngah ṭan la lehzual tur leh, bawlhhlawh bâwmte chu fai taka enkawl ṭha turin a chah.

UDPA director Zorammuana sawi danin, vantlang bawlhhlawh bâwm an semte hi litre 100 dawng a ni a, 890 sem tur niin, a lei nan Rs. 37,83,000 sên a ni. Veng pakhatah bawlhhlawh bâwm 10 ṭheuh pek phawt tur a ni a, veng lian zualte chu la pek belh leh tur a ni.