Aizawlah taxi 3,525 a awm mek Kum 5 chhungin lirthei permit 5,456 pe

Transport department chuan kum nga chhung, 2011 aṭanga 2015 inkar khan mihring phur chi sumdawnna lirthei maxicab, inter-state maxicab, taxi leh auto-rickshaw permit 5,456 a pe chhuak.

Aizawl khawpuiah taxi 3,525 a awm mek a; kum 2009 chin hnu lamah Aizawl district leh district dangah taxi permit pek chhuah awm laiin, Aizawl khawpuia tlan tur bik taxi permit pek chhuah a awm lo.

Assembly session hnuhnung berah MNF MLA Lalruatkima chuan zawhna zawtin, "Kum 2011-2016 chhungin vehicle chi hrang hrang permit engzat nge pek a nih? A year wise in?" tiin a zawt a ni.

Transport minister John Ro-tluangliana'n Lalruatkima zawhna a chhan danin, kum nga chhungin Transport department-in Mizoram maxicab permit 1,759, inter-state maxicab 328, taxi 1,116 leh auto-rickshaw permit 2,253 a pe chhuak a ni. Hetih lai hian, kum 2016 chhung bikah permit pek a la awm lo.

MLA Lalruatkima chuan kum 2011-16 chhungin Aizawl khawpuia taxi awm zat a zawt bawk a; chu chu Transprt Minister chuan 3,525 tiin a chhang. Transport Minister chhan danin, kum 2014-2016 chhungin Aizawla taxi-te chu a tam belh lo a, a tlem chuang bawk lo. Kum 2013-ah Aizawlah taxi 3,598 a awm laiin, a hnu kum thum chhungin 3,525 vek a awm a, a tlemna hi 73 a ni.

Vanglaini palai zawhna chhangin Transport director R Remmawia chuan, kum 2009 aṭangin Aizawl khawpui chhung bika tlan tur taxi petmit thar pek chhuah a ni lo tih a sawi a; chutih rualin, Aizawl khawpui páwn lam, Aizawl district leh district dangah erawh chuan taxi permit pek chhuah eng emaw zat a awm tih a sawi bawk.

Aizawl taxi zat

Kum Taxi

2011 2,853

2012 3,254

2013 3,598

2014 3,525

2015 3,525

2016 3,525