CM’s Award to Toppers sem a ni

Directorate of School Education bultumin nimin khan Vanapa Hall-ah kumin HSLC leh HSSLC-a a ti ṭha zualte hnenah 'Chief Minister’s Award to Toppers' hlan a ni a, School Education minister H Rohluna'n a hmanpui.

H Rohluna chuan, HSLC leh HSSLC-a topper-te chu a lawmpui thu sawiin, an hlawhtlinna chu an bul ṭanna rahbi pawimawh taka ngai turin a chah a, "Zirlaite hi ram tana chhawrtlak, mi puitling ni tura chherchhuah kan duh. Zirlaite hian chhui zui tlak chanchin ṭha an neih loh chuan mi hlawhtlinga chhiar an ni ngai lo," a ti.

School Education Minister chuan, thawh-rimna pumpelh a thiang lotih sawiin, zirlaite chu certificate neih mai duh tawk lo a, ram dangte el phak khawpa thiamna tak tak neih tum turin a chah a ni.

Award semna in-khawm hi School Education additional director K Lalrintluanga'n a kaihruai a; HSLC leh HSSLC topper neitu sikul aiawhin principal ṭheuhte'n thu an sawi. CM Award to Topper hi kum 2013-ah sem ṭan a ni a, zirlaite chu thuchei leh Rs. 50,000
ṭheuh hlan an ni.