Leimin vangin NH-54 hmun hnihah a ping

Pathianni tlai dar 4 vel khan Kawnpui aṭanga Khamrâng lama km. 6 vela hlaah leiminin NH-54 kawngpui a hnawh ping a, nimin zing dar 8:30 aṭangin PWD (Highway)-in a thenfai hna thawk mah se, he thuziah lai thleng hian thenfai a la ni lo. Zemabawka NH-54 kawngpui leiminin a hnawh pawh thenfai zawh a la ni lo.

Kawnpui aṭanga thu dawn danin, Kawnpui dáia leimin thenfaina atan hian JCB hman a ni a, mahse, an thenfai hleih theih loh avangin hna chawlhsan a ni. A thenfai nan excavator ngaihtuah leh a ni a, exacavator hman tur hmuh ni tawh mah se, lirthei kal theiha thenfai hun tur sawi theih a ni lo.

Lirtheite chu tlang kawng (Kawnpui-Dur-tlang) lamah kaltir a ni a, motor liante erawh chu an kal ngam lo a, he thu ziah lai thleng hian Aizawl lam pan tur motor lian 200 vel an tang tawh a ni.

May 21, Inrinni zana Zemabawka NH-54 kawngpui hnawhtu hmun pahniha leimin pawh nimin khan thenfai hna thawh ṭan a ni. Zemabawk Branch YMA vice president Lalramsanga hnen aṭanga thu dawn danin, hmun pakhat zawka leimin chu nimin lirthei khan kaltlang theihin an siam hman a ni.

Leimin nasatna zawk, city bus turning point bula mi erawh chu excavator leh bulldozer-in thenfai hna thawk mah se, lirthei kal theiha siam tlang a la ni lo a, siam tlang nan ni li vel a duh dawn niin an sawi. Leiminin kawng thlanga a hnâwl thlak bus leh pick-up pawh hnuh chhuah a la ni lo.