PWD Chief Engineer-in Bairabi Tlawng lei chhim chhan sawifiah

PWD chief engineer K Lalsawmvela chuan, May 22, 2016 chhun dar 11:30 vela Bairabi Tlawng luia RCC lei dawh mek hmun
ṭhenkhat chim chu lei atana cement chhûn mek dona tui lianin a len thluk vang a nih thu Vanglaini a hrilh.

K Lalsawmvela sawi danin, Bairabi Tlawng lei dawh mek chu metre 160-a sei tur a ni a, metre 40 zelin block paliah
ṭhen a ni. Block pali zinga pathum chu cement chhûn zawh tawh a ni a, block pakhat chu chhûn mek a ni thung. Kawng chhuat tur hnuaiah May 20, 2016 khan cement chhûn a ni a, Pathianni-ah pawh khan hna thawh chhunzawm tum ni mah se, tui lianin a dona thir leh maute a lâk avangin a chim ta a ni.

Tun hnaia ruahsur vangin Tlawng lui a lian hle tih sawiin, K Lalsawm-vela chuan, "Nikuma tui a len lai ber ai pawhin Inrinni leh Pathianni khan tui a lian zawk a, ft. khatin a chîm chin a sang zawk a ni," a ti a; lei tur an chhun mekna block zawnah tui kal a nat loh zawk theihna tura lei chhak deuha tui lak pênna tura siam pawh tuilianin a tichhe vek niin a sawi.

PWD Chief Engineer chuan, Tlawng lei siam meka an khawih mek block-ah lei chhuat tur hnuai chiaha cement chhûn chu ruahman dan chuan May 30-ah zawh tum a ni a, lei chhuat tur pawh June thla laihawlah chhûn tum a nih thu a sawi bawk.

Bairabi Tlawng lei hi dawh hna hi ABCI-in thawkin, kum 2007-ah an thawk ṭan a; metre 160-a thui, metre 7.5-a zau tur niin, a dawh nan cheng vbc. 12.523 ruahman a ni. Dawh zawh hun tura an zawh loh avangin chanchinbu mite pawhin ṭum eng emaw zat an lo enfiah tawh a ni a; ABCI chuan May 2016 chhungin hna lian zual thawh zawh hman an inbeisei thu, tun hnaia tlawhtu chanchinbu mite an hrilh.