KHAWTHLIR

Thih belh

May 21, 2016 zan dar 6:40-a Zonuam, Aizawl-ah leiminin in a delha hliam, Kaplali (80) m/o Rualthankhuma chu May 22 zan dar 9 vel khan a hliam tuar loin damdawi-inah a thi. Leiminin in a delh vang hian Lalthlengliani (40) leh a fanu Lalhmangaihzuali (13)-te chu May 21 zanah an lo thi tawh a; an chenna in a chhiat vek avangin nimin khan an pathumin Zonuam Presbyterian kohhran hall-ah vui a ni.

Lawmthu sawi

Central YMA chuan thuchhuah siamin, Commercial Vehicles Joint Action Committee (CVJAC)-in sorkar laka lungawih lohna an lantirah, mipuite'n harsatna an tawh avangin CYMA-in sorkar leh CVJAC inkarah palai hna an thawk tih a tarlang a; CYMA ngenna anga CVJAC-in lungawi lohna an lantir an titawp chu lawmawm an tih thu a tarlang bawk.

BJP-in tawrhpui

BJP Mizoram Pradesh chuan thuchhuah siamin, May 21, 2016 zan dar 6:40 vela Zonuam venga leiminin in a delh chhiat vanga Lalthangliani (40) leh a fanu Lalhmangaihzuali (13) leh, Kaplali (80)-te an thi chu an tawrhpui thu an tarlang. Lalrintluangi, Dawrpui Vengthar-in May 21 chawhma dar 11-a Mt. Everest a láwn chhuak chu thinlung taka an lawmpui thu an sawi bawk.

Remna Ni

Lawngtlaia Remna Ni vawi 30-na hman dan tur ngaihtuahin nimin khan DC conference hall-ah sorkar official-te leh Central YLA, LWA, MHIP leh MJA hruaitute an
ṭhukhawm. Remna Ni chu CYLA hall-a hman turin an ruahman a, Lawngtlai DC Dr A Muthamma khuallian a ni ang.

Exam hun sawn

Higher & Technical Education department chuan thuchhuah siamin, State Medical and Technical Entrance (SMATE) Examination, May 24-25, 2016-a buatsaih tura tih chu June 7-8, 2016 chhunga neih tur a nih thu a puang. Ruahmanna thar ang chuan, May 27 thleng application form lak chhuah leh thehluh theih a ni a, June 7-8 ah admit card pek chhuah tur niin, June 17-ah result tihchhuah a ni ang.