Tlawng lei chim vangin sorkar an dem

ZNP president Lalduhoma chuan, May 22, 2016 chhuna Bairabi Tlawng lei dawh mek a chim chu lungchhiatthlak a tih thu a sawi a; MNF Media & Publicity-a general secretary Lalruatkima, MLA pawhin Tlawng lei chim chu hna thawh muang lutuk vanga niin a sawi.

Nimina ZNP pisaa inkhawmah thu sawiin Lalduhoma chuan, “Congress sorkar hnuaiah lei tam tak a chim a, Airport panna kawngpuia Tlawng lei vawi hnih a chim tawh a, May 22-a Bairabi bula Tlawng lei dawh mek a chim leh ta hi a lungchhiatthlak hle ni," a ti.

ZNP President sawi danin, Bairabi Tlawng lei dawh hna chu MNF sorkar lai, kum 2007-ah pek niin, June 28, 2010-a dawh zawh tura tih a ni a, PWD, Kawrthah Division-in an enkawl. Lei dawh zawh hun tur chu December 16, 2012 thleng pawhsei a ni a; chumi hnu, June 28, 2015-a Kolasib leh Mamit MJA member-te'n an enfiahnaah, lei dawhtu ABCI manager AK Singh chuan May 2015 chhunga dawh zawh ngei a nih tur thu lo hrilh mah se, tun thlengin an la dawh zo lo. Lei atana original estimate chu Rs. 6,12,50,000 a ni a, revised estimate-ah Rs. 12,52,30,000-ah tihsan a ni.

Lalduhoma chuan, "Kum hnih chhunga dawh zawh tura tih a nih laiin, kum hnih dang pawhsei a nih hnuah, kum riat chhung pawhin dawh zawh a ni lo. Ruahtui tam vanglai taka lui lai tak, tui zangkhauh luanna lai taka chhe mai tura hna thawh a ni hian a chhiat ngei ring saa lei dawh hun tur extend nawn leh zelna tur leh senso tur revised leh beiseia thil tih luih a ang viau," a ti.

ZNP President chuan, Congress leh MNF sorkarah company rintlak tak hna pek a ni ngai lo nia sawiin, "MNF leh Congress sorkarah ABCI bakah, Tantia, NBCC, Sunshine Overseas tih vel an tlatlum hle reng a, company rintlak zawk an la lut duh miah lo mai hi a mak a ni,” a ti a; Rangvamuala leimin vanga kawng ping reng ṭhin an chingfel thei lo chu thil zahthlak a nih thu a sawi bawk.

Lalruatkima hian nimin khan Mizo Hnam Rûnah thu sawiin, "Bairabi tlawng lei hi kum kaw chhung pawhin sorkarin a dawh zo thei lo. Lei hi kum 2008
aṭanga dawh ṭan tawh, kum ruk kal taa dawh zawh tura tih a ni a, a hnu zelah revised estimate ṭum thum siam a ni leh tawh. Congress sorkar hian eng nge chhuanlam an siam leh dawn ka hre lo. Bairabi Tlawng lei dawh hi an hnûk muang nasa lutuk a, an hnûk chim a ni," a ti.

Congress sorkar chu an kut a hmui tawh lo hle nia sawiin Lalruatkima chuan, "Chhimtuipui Darzo kâi lei an dawh mek a chim a, Sihhmui lei ṭum thum zet a chim tawh bawk. Sihhmui lei dawh ṭhatna tur hi Ministry of Road Transport & Highways chuan sorkarin pawisa a dil nuai 297.26 chu April 30, 2015 khan an rawn pe daih tawh a, mahse, lei dawh ṭhat nan an la hmang lo," a ti a; Congress sorkar awm dan chu tla tur zia niin a sawi.