Sorkar sikulah post ruak 49.03% a awm; M/S Hindi zirtirtu post ruak a tam ber

School Education depart­ment hnuaiah zirtirtu post awm zat (sanctioned post) 7,224 zingah ­post ruak 3,542 (49.03%) a awm. Post awm zat aṭanga chhûtin middle school Hindi zirtirtu post ruak 56.49% awmin a tam ber.

RTI Act tlawhchhana zawhna School Education department SPIO-in May 27, 2024-a a chhàn danin, primary school, middle school leh high school-ah zirtirtu post 7,224 a awm a, chu'ng zinga 3,682 (50.97%) chu hnawhkhah niin, post ruak 3,542 (49.03%) a awm.

Sikul hrang hranga zirtirtu post ruak zingah middle school-a Hindi zirtirtu post ruak a tam ber a, M/S-ah hian Hindi zirtirtu post 724 zinga 315 hnawhkhah niin, post ruak 409 (56.49%) a awm. Zirtirtu post ruak zat aṭanga chhûta post hnawhkhah tam ber chu high school-a Hindi zirtirtu a ni a, sanctioned post 384 zinga 258 (67.19%) hnawhkhah a ni.

P/S, M/S leh H/S-a zirtirtu post ruak zawng zawng 3,542 zinga 1,280 chu M/S zirtirtu a ni a; P/S-ah zirtirtu post ruak 1,191, H/S-ah zirtirtu post ruak 535 a awm. Post ruak tamna subject Hindi bikah M/S-ah post ruak 409 leh H/S-ah post ruak 126-te a awm bawk.

School Educartion SPIO chuan, P/S, M/S leh H/S-a zirtirtu lâk thar an awm leh awm loh zawhna chu - March 14, 2024 khan a nghet turin H/S zirtirtu 50 lak a nih thu a tarlang a; P/S leh M/S-ah erawh zirtirtu lak thar an awm rih lo.

Tun dinhmunah headmaster indaih lohna 583 a awm a, chu'ngte chu P/S-ah 349, M/S-ah 202 leh H/S-ah 32 a ni.

Mizoram sorkar hnuaia P/S, M/S leh H/S-ah zirtirtu 4,545 an awm a; mi 3,662 chu a ngheta thawk an ni a, contract-a thawk mi 21 leh muster roll-a thawk 862 an awm a ni.