Ruang pakhat hmuh belh; Mi 28 hmu tawh, paruk la hmu lo

May 28, 2024 zinga Aizawl district hmun ṭhenkhata leiminin in a hnâwla thite zinga la hmuh loh - Melthum, Hlimen leh Aibawka mite chu nimin khan zawn chhunzawm leh a ni a, ruang pakhat hmuh belh a nih laiin, hmuh loh paruk an la awm.

Thu dawn danin, Hlimena leiminin mi paruk a chhilh zinga la hmuh loh awm chhun mi pakhat ruang chu nimin khan hmuh a ni. May 28 leh 29 khan mi dang pangate ruang lak chhuah a lo ni tawh a, heti hian Hlimena leiminah hian mitthite ruang lak chhuah kim a ni tawh.

Melthumah pawh nimin khan mitthite zawn chhunzawm ni mah se, hmuh belh a ni lo. Melthuma leimin hian mi 19 a chhilh hluma hriat a ni a, mi 15 ruang lak chhuah tawh niin, mi pali hmuh an la ni lo.

Aibawka leiminin in pakhat a hnâwl­naa a hnâwl tel Matthew Lalchhan­hima (34) leh a nupui Vanlalruali (34)-te pawh nimin khan zawn chhun­zawm a ni a, nimin tlai thleng khan hmuh an la ni lo. Aibawka leiminin in a chhilhna thlangah hian luikawr a awm a, chu chuan Tlawng lui a pawh a, mi ṭhenkhat chuan tuiin Tlawngah a len thlen tawh an ring nia thu dawn a ni.

Aizawl DC Office aṭanga thu dawn danin, May 28, 2024 zinga leiminin khua/veng paruka in eng emaw zat a hnâwla thi zinga mi 28 ruang lak chhuah tawh niin, ruang la hmuh loh paruk a awma ngaih a ni a, mitthi zawng zawng chu mi 34 vela ngaih a ni. Hetih lai hian, leiminin a hnâwl zinga tel mi pali chu nungdama chhan chhuah a ni thung.

Mitthi lak chhuah tawhte chu - Melthumah 15, Hlimenah paruk, Salem Vengah pathum, Falkawnah pahnih, Kelsih leh Lungseiah pakhat ve ve a ni.

Melthum leiminah Claire Zoremmawii (6) d/o Lalchawimawia, Melthum leh Sumit Ray (20) s/o Sikendar Ray, Dharampur, Jharkhand-te chu nung­dama lak chhuah an ni a; Falkawna leiminah Kaphlira leh a fanu Lalpiangliani te nungdama lak chhuah an ni bawk.

Chhiatna thlengah hian thu dawnna lamah tihsual palhte a awm ṭhin avangin mitthi zatah danglam a awm zauh zauh ṭhin a ni.