AIDS vanga thite sûn nan bati chhi

Positive Women Network Mizoram (PWNM) huaihawtin nimin khan Mission Veng Kohhran Hall-ah International AIDS Candlelight Memorial Service huaihawt a ni a, chief minister Lalduhoma'n a hmanpui. HIV/AIDS vanga thite sûn nan bati chhit a ni.

CM Lalduhoma chuan, AIDS Candlelight Memorial Service chu HIV/AIDS vanga thi tawhte hriatrengna leh natna a darh zel lohna tura thawktute chawimawina hun leh infuih tharna ni a nih thu a sawi a; PWNM hmalaknaah a lawm thu sawiin, an rawngbawl zelna turah duhsakna a hlan bakah, harsatna an neihte a hnena thlen ṭhin turin a chah.

Bati (candle) chu mi dangte'n ênna an hmuh theih nan a inchhi ral ṭhin tih sawiin Lalduhoma chuan, "Keini pawh bati ang hian mi dangte'n malsawmna an dawn theih nan kan inchhi ral ve ang a, he natna lak ata mite an him theih nan leh natna kai palhte pawhin enkawlna ṭha an dawn theih nan i bei zel ang u," a ti.

Lalduhoma chuan, MSACS-in an chhin­chhiah danin, Mizoramah mi 24,864-in HIV/AIDS an vei tawh tih sawiin, "An zinga mi 5,021-in min boralsan tawh. Tuna he natna tuar mek kan ṭhiante zingah hian tam takin ART (Anti Retroviral Therapy) ṭha taka an lak laiin a, la rih lo kan la nei nual," a ti a; HIV vei zingah an awmna chhui zui hleih theih loha awm pawh an awm thu a sawi.

Chief Minister chuan, Mizoramah ART centre 14 a awm mek a, district hospital tin bakah ZMC, Kulikawn Hospital leh Synod Hospital-ahte a awm thu a sawi a, "Kan ART centre-te hi ṭhenkhat tan chuan a lo hla deuh hlek pawh a ni thei a, mahse, ART lak ngei hi he natna enkawl nana thil ṭha ber a nih avangin natna tuar mek kan ṭhiante hian pan hrâm se kan duh a ni," a ti.

AIDS Candlelight Memorial Service-ah hian Aizawla kohhran hrang hranga hmeichhe pawl aiawhte an tel a; AIDS vanga thite sûnna leh hriatreng nan bati chhit nih bakah, infuihna leh ṭawngṭai rualna hun hman a ni. PWNM secretary Lalrinpuii'n an pawl hmalaknate a sawi a, Zoramchhuana'n PWNM president Vanlalruati chanchin a sawi.