Sorkar hotute'n chhiatna thlengte thlir lêt; Dan leh kalphung ṭha zawk neih a ṭul - CS
Cyclone Remal vanga Mizoram hmun hrang hranga chhiatna thleng chungchang nimin khan chief secretary Dr Renu Sharma kaihhruaiin CS conference room-ah sorkar department hotute'n an thlir lêt. Chief Secretary chuan, in sak dan, tui luankawr siam dan leh kawng siam danahte dan leh kalphung ṭha zawk ngaihtuah turin kal khawmte a fuih.
Dr Renu Sharma chuan, department hrang hrang hotute chu cyclone vanga chhiatna thlengah an tih tur ṭheuhte an thawh ṭhat thu a sawi a, "Chhiatna thleng dinhmun hre chiangin, in chanpual chin vil ṭha u la, chhiatna thlen leh palh atan kal dan tur mumal tak (standard operating procedure) nei ṭheuh ang che u," a ti a; chhiatna laka mipui him zawk theih nan in sak dan, luikawr siam dan leh kawngpui siam danahte dan leh kalphung ṭha zawk neih a ṭul thu a sawi.
Chief Secretary chuan, rang taka zangnadawmna leh chhawmdawlna pek a nih theih nan mamawh ang ang hriattir vat turin sorkar hotute a chah a, "Sorkar laipui hnenah report thehluh a ni dawn a, PWD, DMR, PHE, Power & Electricity leh FCSCA secretary-te'n naktuk chawhmaah report thehluh turte an peih hman a ngai," a ti.
Ṭhutkhawmah hian department hrang hrang hotute'n Cyclone Remal vanga chhiatna thlenga an department hmalakna ṭheuh leh harsatnate an tarlang.
DEPARTMENT HMALAKNA LEH HARSATNA
PWD : Leimin vanga hmun hrang hranga kawngpui pingte an thian mek.
PHE : Aizawl châwmna tui pek chhuahna khâwl chhia a awm nual avangin tui pek chhuah theih a tlem rih dawn a, siamṭhat tum mek a ni. Tui ren tura mipui ngenna thu an chhuah.
Power & Electricity : Kawlphetha pek chhuahna khawl sub-station tam zawk siamṭhat tawh a ni a, chawlhkar khat chhung chuan sub-station zawng zawng siam zawh hman an inbeisei.
FCSCA : Champhai, Aizawl leh Serchhip district-ah buh leh vaimim tlem a chhia a, harsatna tâwkte ṭanpui mek a ni.