ASF vangin niminah vawk 17 thi, 76 suat

Mizoramah vawk pùl hri, African Swine Fever vangin vawk hri lenna hmun (infected area) leh vawk thi a pung zel. Nimin khan vawk 17 thiin, vawk 76 suat a ni a; kumin 2024-ah nimin thleng khan ASF kaihhnawiha vawk thi leh suat 2,933 a tling tawh.

Kuminah January 1 aṭanga nimin thleng khan district parukah ASF vangin vawk 1,098 a thi tawh a, hri darh zel tur ven nan vawk 1,835 suat tawh a ni tawh bawk a; ASF kaihhnawiha vawk thi zawng zawng chu 2,933 a ni.

Nimin khan ASF vang hian Aizawl leh Khawzawl district-ah vawk 17 a thi a; Aizawl leh Serchhip district-ah vawk 76 suat a ni bawk.

Nimina ASF vanga vawk thi awmnate chu - Thingsulthliahah paruk, Thingsul Tlangnuam leh Dulte-ah pathum ve ve, Falkawn leh Kawlkulhah pahnih ve ve leh, Muallungthuah pakhat a ni. Nimina vawk suat dan chu - Durtlang Leitan 16, Zemabawk 15, Aizawl Chanmari-ah 12, Republic Vengah paruk, Bungkawn Vengtharah pathum, Khumtungah pakua, Chhingchhipah pasarih, Thingsul­thliahah paruk leh Falkawnah pahnih a ni.

Mizorama district parukah vawk hri lênna khua/veng 63 a awm mek a, chu'ng zinga 50 chu Aizawl district-a mi a ni.