Green Mizoram Day hman dan tur rél a ni

Champhai leh Serchhipah nimin khan district bawrhsapte kaihhruaiin sorkar official-te'n June 11, 2024-a Green Mizoram Day hman dan tur an rêl. Kumina Green Mizoram Day thupui tur chu, 'I nunna atan thing phun rawh' (Plant trees for your life) tih a ni.

Champhai DC James Lalrin­chhana hoa ṭhutkhawmah Green Mizoram Day 2023 hman dan thlir lêt a ni a; an tarlan danin, nikum khan thing ṭiak 1,971 an phun zinga 90% vel a nung ṭha a, Champhai Forest Division hnuaia range pasarih kaltlangin thing phun tur 11,137 pek chhuah a ni.

Green Mizoram Day 2024 pualin NH-6, Khankawn aṭanga Tuipui lei inkar leh Khankawn-Zotlang inkarahte thing 1,600 - 1,700 vel phun tum a ni.

Serchhip DC David Lalthan­tluanga hoa ṭhutkhawmah, kum 2023 khan thing ṭiak 427 phun zinga 85% vel an dam khawchhuak a, pawl hrang hrang hnenah thing ṭiak 2,301 sem chhuah a ni tih an tarlang.

Serchhipa Green Mizoram Day hman ní-ah a huhoin Kikawn leh Chhiatlang inkar kawngpui dunga road reserve area-ah Tlaizawng, Chawnpui, April leh thing dangte phun an rêl a ni.