LADC EM atan MDC pakua la lut

Lai Autonomous District Council-a chief executive member (CEM) C Lalmuanthanga'n executive member (EM) atana a ruat mi pakuate chu nimin khan rinawmna thu tiamtira lak luh an ni. EM-te hna chanpual tur pawh CEM-in nimin vek khan a siam nghal.

LADC EM lak luhna inkhawm hi LADC Hall-ah neih a ni a, LADC executive secretary K Lalthanzara'n a kaihruai. EM atana ruatte chu Lawngtlai bawrhsap Chemala Siva Gopal Reddya-a'n rinawmna thu tiamtirin a la lut a ni.

LADC-ah hian MDC bial 24 awmin, inthlana thlan tlin MDC 24 an awm mek a, MLA atana thlan tlin tâk Dr Lorrain Lalpekliana Chinzah bial chu a ruak mek. CEM C Lalmuanthanga chu Congress party a ni a, a kaihhruai sorkara amah thlâwptu MDC 12-te chu MNF vek an ni. CEM telin elected MDC 24 zinga 10 (41.67%) chu department enkawl nei an ni ta a ni.

CEM C Lalmuanthanga chuan, langtlang sorkar, mipui ban phak, thunei fál bik awm lo, rualkhai taka ram tana hnathawh chu an tum ber a nih thu a sawi.

CEM chuan, a kaihhruai sorkar din theihna turin chief minister Lalduhoma leh District Council & Minority Affairs minister C Lalsawivunga ten theihtawp an chhuahpui thu leh a lawm thu a sawi a; Governor-in pa chan changa hma a laknaah a lawm thu a sawi bawk.