KHAWTHLIR

Tanpuina hlan
Aizawl mayor Lalrinenga Sailo, deputy mayor R Thanglura leh executive corporator-te chuan May 29, Nilaini khan Melthum leh Hlimena chhiatna thlenna hmun an tlawh a; chhanchhuah hna thawkte tan a ṭul apianga hman turin Rs 30,000 an hlan. Luangmual thlànmual min vanga thlân sawn hnatlangte pawh an tlawh a, a ṭula hman atan Rs 10,000 an hlan a ni.

Pipe siam mek
Serchhipa PHE Executive Engineer chuan thuchhuah siamin, Cyclone Remal vanga tui sem darhna pipeline chhiate leh khawl chhiate thlâk leh siamṭhat hna an thawh thu leh, Serchhip mipuite'n khaihlak loa tui an dawn theih nan ruahmanna siam a nih thu a tarlang. Tui renchem tur leh ruahtui khâwl turin a ngen bawk.

Kawlphethain a man vangin thi
Nimin chawhma dar 11:15 vel khan Saihmingthanga Sailo (38) h/o Lalfamkimi, Lunglei Zohnuai chu Khawiva kawnga kawlphetha chhia an siamnaah electric bana a làwn laiin electric current-in a man avangin a thi. Saihmingthanga Sailo hi Christian Hospital, Serkawn panpui nghal ni mah se, thlenpui a nih chuan a lo thi tawh a ni.

CM Relief Fund
Nimin khan Chief Minister's Relief Fund-ah Rs 3,12,000 a lut a; UPC (NEI)-in Rs 1,00,000, NABARD-a thawkte'n Rs 1,00,000, Ngursanglur Sanata, MLA, Tipaimukh (Manipur)-in Rs 50,000, Diocese Catholic Ṭhalai Pawl, Aizawl Diocese-in Rs 30,000, Young Paite Association, Lamka-in Rs 20,000 leh Bank of Maharasthra, Aizawlin Rs 12,000 an thawh a ni.

Lei laih khap
Serchhip DC David Lalthantluanga chuan kumin June 15 aṭanga August 31 thlengin phalna nei loa lei laih leh leivûng hmanga ruam/kawr chhun khah a khap. DC chuan, fûrpui laia lei laih avangin chhiatna leh thihna thleng palh thei a nih avangin lei laih phal loh hun siam a ṭul thu tarlangin, "Thupek bawhchhiate chu dan angin an chungah hremna lek a ni ang," a ti. Thupek hian NH-54 siam mek te, sorkar hmalakna hnathawhte leh DC aṭanga phalna neite a huam lo.