SEDP zirtirtute an châwl tawh dawn; 'An aia tam kan la dawn' - Education Minister

MNF kaihhruai sorkarin SEDP hnuaia School Education department-a zirtirtu, LDC leh 4th grade a lakte chu June 1, 2024 (vawiin) aṭangin an châwl tawh dawn. School Education minister Dr Vanlalthlana chuan, SEDP zirtirtu aia tam zirtirtu an lak dawn thu a sawi.

Vanglaini palai zawhna chhangin Dr Vanlalthlana chuan, SEDP zirtirtute chu anmahni thlâktu tur lak la ni lo mah se, an lo sawi lâwk tawh angin June 2024 aṭang chuan an chawlh tawh dawn thu a sawi a, "Anmahni thlaktu tur lakna tur atan May 29 khan exam buatsaih a ni a, result erawh Election Model Code of Conduct zawhah puan a ni ang," a ti.

SEDP zirtirtu châwl turte chu mi 1,100 vel an nih thu sawiin Minister chuan, "Zirtirtu kan lak thar tur chu mi 1,400 vel a ni. Kan lak hunah SEDP zirtirtute hmun ruak an luah khat dawn," a ti a; zirtirtute lak fel thuai a nih dawn avangin SEDP zirtirtute chhawr zui ni dawn lo mah se, zirnaah harsatna a awm loh tur thu a sawi.

School Education Minister sawi danin, SEDP hnuaia LDC leh 4th grade lakte chu chawlhtir ni ve tho dawn mah se, Finance department-in an aiawhtu tur lak a la remtih loh avangin mi thar lâk a ni dawn rih lo.

Tarlan tawh ṭhin angin, Mizoram sorkar chuan SEDP zirtirtute thlâkna tura ngaih casual teacher lâk a tum a, chuta tan chuan March 15, 2024 khan advertisement chhuah a ni. Casual teacher hi high school atan mi 350, middle school atan mi 371 leh primary school atan mi 694 lak tum a ni a, an vaiin mi 1,415 an ni.

SEDP hnuaia School Education depart­ment-a thawktu lak zinga zirtirtu ni lo, non teaching staff-te chu ZPM kaihhruai sorkar a pian hnuah tihtawp nghal tura tih a ni a; zirtir­tute chu lâk an nih hun chhung tàwp thleng thawk tura tih a ni thung. Zirtirtute chu March 31, 2024 thleng thawk tura lâk an ni.

SEDP hnuaia zirtirtu leh thawktu dangte chu Mizoram sorkar chuan an thawh theih hun chhung tur pawtseiin, May 31, 2024 thleng thawk turin a ti leh a; an thawh hun pawhsei a nih tawh loh avangin May 31 thleng bak an thawk tawh dawn lo a, June 1, 2024 aṭang chuan an chawlh a ngai tawh dawn a ni.