Tlawngah hmeichhe ruang chhar

Hortoki khaw mite chuan nimin khan an khaw bula Tlawng luiah hmeichhe ruang an chhar a, Aibawka leiminin a hnawl Vanlalruali a ni tih finfiah a ni.

Thu dawn danin, Hortoki Joint YMA chuan Mualkhang khaw mite aṭangin Tlawng luiah hmeichhe ruang ni ngeia hriat an hmuh thu an dawng a, lawngleng hmangin an lo zawng nghal a, Hortoki Tlawng kai aṭanga km. 7 vela hláah ruang chu hmuin an la chhuak. Ruang chu kuanga dah a nih hnuah Kawnpui panpui a ni a, Kawnpui damdawi-inah endik a ni.

Ruang chhar chu Melthuma leiminin a chhilh vanga naupang ruang zawn mek a nih leh nih loh finfiah turin Melthum aṭangin mi ṭhenkhat chu Kawnpuiah an kal a, an veng naupang a ni lo tih an finfiah.

Aibawka leiminin a chhilh vanga zawn mek Vanlalruali (34) a nih leh nih loh finfiah turin Aibawk mite pawhin Kawnpui an pan nghal a, Chhimphei huam chhungah kawng chhia a tam avangin lirtheia kal theih a ni lo a, kein Aizawl an pan phawt a ni. Nizan dar 7:30 vel khan ruang dahna hmun an thleng a, ruang chu Vanlalruali a ni tih an finfiah a ni.

Hmeichhe ruang hi Kawnpui damdawi-ina endikna (postmortem) aṭangin naupang ni loin, hmeichhe puitling ruang a ni tih finfiah a lo ni tawh a ni.