MSU-in HSSLC-a ti ṭhate an chawimawi
Mizo Students' Union (MSU) chuan nimin khan HSSLC Examination 2024-a top 3-a tlingte chawimawina hun Chanmari YMA Hall-ah an hmang a, School Education minister Dr Vanlalthlana'n a hmanpui.
Inkhawmah hian arts, science leh commerce-a pakhatna aṭanga pathumna ṭheuh, mi pakua hnenah chawimawina hlan a ni a; kâwng chin hnuai lam zeng chunga HSLC-a distinction-a pass, subject palia letter hmu thei Dominic Vanlalpekhlua, Presbyterian English School, Sihphir Venglai hnenah chawimawina hlan a ni bawk.
School Education Minister chuan, zirlaite chu an hma lam hun atan tun aṭanga rilru siam turin a chah a, "Tun aṭanga rilru in siam lâwk loh chuan in tlachhia ang. Ṭhiante tih ang tih ve zel a thiang lo a, ṭhian kawm tur thlang fimkhur ang che u," a ti.
College-ah kum eng emaw zat a thawh tawh thu sawiin Dr Vanlalthlana chuan, "Ṭha taka pawl 12 pass leh mark pawh hmu sang takte zirlai kan nei ṭhin a, mahse, college pass chhuak lo eng emaw zat an awm tawh. Insûmtheihna leh nih tum nei saa zir a pawimawh," a ti a, hmathlir thui tak nei turin zirlaite a chah.
Education Minister chuan, zirlaite chu lehkhabu leh internet hmang ṭangkai tur leh an thil tih tum a hlawhtling lo a nih chuan thlâk mai turin a chah a, "Kum paih aiin kan goal a pawimawh zawk," a ti a; hna zawng tura lehkha zir lo a, mahni intodelh tura zir zawk turin a chah bawk.
Zirlaite chawimawinaah hian ZIDCO chairman JK Dawngzuala, Mizoram Cooperative Apex Bank chairman Lalnunsanga leh MSU president Samuel Lalramthanpuia te pawhin thu an sawi a ni.