Aizawl South-III MLA-in lawmthu a sawi

Aizawl South-III bialtu MLA Baryl Vanneihsangi Tlau chuan, a bial chhunga chhiatna thlengah ṭanpuina leh chhawm­dâwlna an dawn avangin nimin khan lawm­thu sawina a tichhuak.

Baryl Vanneihsangi chuan, vanduaina thlen hnu rei lo têah Chief Minister, Home Minister, minister dangte leh MLA-te an thlen khawm thu tarlangin, "Pawisa leh thilpek ṭangkai tak tak an rawn hlan a, sorkar mi pawimawh Home Secretary, DC leh police, rescue team, doctor, army/force, kohhran, Central YMA leh YMA branch hrang hrangte’n hah leh hrehawm pawisaloin ruang zawn leh buaipui hna ngawrh takin an thawk a ni," a ti.

An bialin chhiat an tawhna kara Zo nun ze mawi tlawmngaihna lantirtute'n a thlamuan thu sawiin MLA chuan, "Thin­lung takin lawmthu kan sawi. Chhiat­tawhna vanga kawng­pui inkalpawh theih loh a tam hle a, power supply leh tui peknaah harsatna kan tâwk nasa," a ti a, an harsatna tawh sukiang turin department-te'n chhun zan zawma an thawh thu a tarlang.

Aizawl South-III MLA chuan, vanduaina an tawh chuan hun rei tak chhung a nghawng dawn tih tarlangin, "Chenna in sak ṭhat ngai te, huan lo ram din ṭhat ngai te, khawtlang hruaitu YMA, VC/LC-te an sum neih zawng zawng an chêt chhuah­pui avanga kutbénga awm te, mi tam tak eizawnna thlengin a nghawng dawn avangin ṭawngṭaipui kan ngai hle," a ti bawk.