Thu belhchian dâwl lo hmanga mipui rilru hruai pên tum lo turin ZPM chah

MNF party chuan nimin khan an pisa, Mizo Hnam Runah inkhawm an nei a, thu sawitu MNF general secretary R Rohmingliana chuan thu belhchian dâwl lo hmanga mipui rilru hruai pên tum ṭhin sim turin ZPM an chah.

R Rohmingliana chuan, "Thu dik hrûla thu belhchian dâwl lo hmanga mipui rilru hruai pên an tum fo hi ZPM-te hian sim rawh se," a ti a; SASCI sum kîr chungchanga ZPM-in social media lamah debate ngam lo anga MNF an sawi chu thu belhchian dâwl niin a sawi.

SASCI sum lapse chungchanga ZPM-in MNF Legislature Party-te public debate tura an chona chu an ngam thuin an chháng lêt nia sawiin Rohmingliana chuan, "Kan chhàn lêtna lehkha hi social media vela thehdarh ve mai loin keimah ngeiin ka pe. Special assembly ngeia sawiho ni se tiin kan rawt. Tawnzau eng ha boxer-te'n tawnzau pawl ha boxer-te inhnek puia min sawmna hi kan pawm thlap a, boxing ring neitute an nih anga ring lo buatsaih tura kan rawtna a takin an tihlawhtling ngam ta lo," a ti.

R Rohmingliana chuan, "Sum lapse hi ka ui lutuk a, sawi fo pawh ka duh tawh lo. Kan hlauh ang ngeiin a lapse ta a, a uiawm tak zet a ni," a ti a; SASCI sum lapse chungchanga Assembly House-a a zawhna leh a thusawite en lêt theih vek a nih thu a sawi.

MNF General Secretary chuan, tun hnaia khuarel chhiatna thleng chu party pakhatin hamṭhatna lak nan hman an tum nia a lan thu sawiin, "Mi chhiat tawhna kara hamṭhatna lak lo tum hi a zialo tak zet," a ti a; Assembly-a Leader of Opposition-in car hlui tawh tak a dawng a, rei lo te hnuah an in pawh a thleng zo lo a, a hnua car an pek leh pawh workshop-ah a awm mek niin a sawi bawk.