Chhiatna tuartute ṭanpuina kan dilsak - BJP President

BJP, Mizoram Pradesh chuan nimin khan an pisaah political session an nei a, thu sawitu an president Vanlalhmuaka chuan, tun hnaia khuarel chhiatna tuartute tan sorkar laipuiah ṭanpuina an dilsak niin a sawi.

Vanlalhmuaka chuan, Mizorama chhiatna thleng chungchang chu sorkar laipuiah leh BJP central office-ah an thlen nia sawiin, "Prime Minister hnenah e-mail thawnin, khuarel chhiatna vanga nunna chán te, hliam te, in leh lo chán te, huan lo ram eizawnna atana hman tihchhiatsaka awmte tan ṭanpuina kan dilsak. PMO pawh phone-in kan hrilh tawh bawk a, PMO aṭangin an bawhzui tur thu min rawn hrilh bawk," a ti.

Mizoram BJP President chuan, BJP MLA Dr K Beichhua'n BJP Legislature chairman a nihna angin Prime Minister hnenah Mizorama chhiatna thleng ṭanpuina atan cheng vbc. 1,000 a dilsak niin a sawi bawk.

Lok Sabha inthlan chungchang sawiin Vanlalhmuaka chuan, BJP-in an sorkar leh ngei dawn niin a sawi a, "Pu Modi-a leh a kaihhruai party hian a term thumna atan kan sorkar leh dawn kan tih theihna chhan chu mipui hmaa kan thutiam kum 10 chhunga kan hlen vang a ni. Mipui hmaa kan intiamna kan sawi pial ve lo a, sawi pial kan tum hek lo a, kan sawi loh angin hma kan la ngai lo. Chuvang chuan mipui zarah kan sorkar leh dawn tih hi kan sawi ngam a ni," a ti.