Nunphung natna chungchang thlirho

Governor Dr Hari Babu Kambhampati chuan nimin khan Raj Bhavan-ah ‘Presentation and Talk on Lifestyle Diseases and Diabetes’ hun a hmanpui a; Hyderabad-a Apollo Hospital physician Dr Vasanth Kumar-a'n thil pawimawhte a sawifiah.

Dr Hari Babu Kambhampati chuan, khawvelah taksa sâwizawi tlem avangin zunthlum, blood pressure sang leh natna dangte a hluar thu a sawi a, "Mahni taksa leh rilru hriselna ṭheuh ngaih pawimawh a ṭul. Hriselnain ni tin hna thawhnaah leh thutlukna siam kawngah nghawng nasa tak a nei thei," a ti a; mahni hriselna ngaihthah lo turin mi tin a chah.

Raj Bhavan-a hun hmanah hian nun dan ṭha lo vanga natna hrang hrang, a bikin zunthlum (diabetes) a thlen dan te, nun dan leh ei leh in tur ngaih pawimawh a ṭul dante thlirhoa sawiho a ni.