Sakhaw dang chunga hleihlenna tihreh tum ngai loah BJP sorkar puh

Congress party chuan nimin khan Congress Bhavan-ah political session an nei a, MPCC vice president Ronald Sapa Tlau-in thu sawiin, BJP sorkar chu sakhaw dangte chunga hleihlenna tihreh tumna nei ngai loah a puh.

Ronald Sapa Tlau chuan, May 28, 2024-ah Mizoram BJP president Vanlalhmuaka'n, Congress sorkar lai, Indira Gandhi hun laiin hnam tlem zawk leh sakhaw dangte an chêp hle nia a sawi chu pawi a tih thu a sawi a, "Thil zir ching hmasa lo leh hre chiang mang si loa a rawn sawi kha a pawi hle a ni," a ti.

Congress sorkar lai, kum 1964 aṭanga 1996, kum 32 chhungin hnam hnuaihnung leh sakhaw tlem zawkte tihduhdahna India ramah vawi 32 a thleng nia sawiin Ronald Sapa chuan, "Congress sorkar laiin hetiang thil hi a thlen cháng awm ve bawk mah se, a rang thei ang bera hmeh mih tumin hma an la nghal ṭhin. BJP sorkar hnuaiah erawh chuan sakhaw dangte chunga hleihlenna a awm apiangin tihreh tumna a awm ngai lo," a ti a; RSS, Bajrang Dal leh VHP-te chu BJP hmahruaitu an nih avangin BJP sorkarah Kristiante tawrhna a nasa zual niin a sawi.

MPCC Vice President chuan, BJP sorkar lai, kum 2016-2019 chhungin India ramah sakhaw tlem zawkte chunga hleihlenna vawi 1,444 a thleng nia sawiin, "Tunah hian BJP-te'n MP 400 an neih tlin chuan Indian Constitution aṭanga secular tih hi paih an tum thu ualau takin an sawi a ni," a ti.