KHAWTHLIR
MLA-in enfiah
Aizawl West-II bialtu MLA Lalnghinglova Hmar, minister of state chuan nimin khan a bial chhung Dawrpui Vengthar Presbyterian biak-in chhaka leiminna hmun a enfiah a, bialtu zonal officer leh PWD hotute nen hmalak zel dan tur an sawiho. Bialtu MLA ho hian PWD-in leivûng an paih mek chu chak zawka kalpui dan tur ruahman a ni a, zonal officer hmalaknain DC Office, PWD leh DMR aiawhte’n joint inspection neih a, ruahmanna siam thuai ni se, an ti.
Chhawmdâwlna pe
Cyclone Remal tuartute chhawmdawlna atan nimin khan pawl leh mimal hrang hrangin Chief Minister's Relief Fund-ah Rs 3,64,900 an chhûng lut. Pawisa thawhtute chu - Canada Mizo Chhungkua Rs 1,54,200, Mizoram Armed Police Association (MAPA) in 50,000, Mizoram Finance & Account Service Association Rs 50,000, Evangilical Synod Church, Lamka Rs 50,000, MUP Rs 30,000, Hmar Student Association, Delhi Rs 30,000, Tualpui Welfare, Aizawl Rs 20,700 leh, Karbi Anglong Unao Forum, KTP, Republic Veng Branch leh ZPM organiser Lalṭhakimi ten Rs 10,000 ṭheuh a ni.
MLA-in laptop pe
Serlui bialtu MLA Lalrinsanga Ralte chuan nimin khan Vairengte SDO (Civil) conference hall-ah a bial chhung zirna-in hrang hrang aṭanga kumin HSLC leh HSSLC-a distinction-a pass-te hnenah lawmpuina atan laptop a hlan. Distinction-a pass awmna sikulte hnenah thilpek a pe bawk. Lalrinsanga Ralte chuan tuna lawmpuina leh chawimawina an dawn chu duhtawk mai loa, hlawhtling tlaka taima taka zir chhunzawm zel turin a fuih.
Pass-te lawmpui
YMA, Republic Veng Branch chuan May 30, Ningani zan khan an community hall-ah kumin HSLC leh HSSLC exam-a zirlai ti ṭhate chawimawina hun an hmang a, bialtu MLA C Lalsawivunga, minister-in a hmanpui. Republic Venga HSLC pass thar mi 54 leh HSSLC pass thar mi 43-te hnenah lawmpuina hlan a ni. C Lalsawivunga chuan, zirlaite chu an kal zelna turah Pathian dah hmasa ber tur leh ruihhlo leh zu laka inthiar fihlim turin a fuih.
Synod Lay Day hman a ni
Mizoram Synod hnuaia thawk pastor/minister ni lote chuan nimin khan Synod Hospital hall-ah Synod Lay Workers Fellowship Annual General Meeting (Lay Day) an hmang a, Synod moderator Rev. R Vanlalnghaka'n a hmanpui. Synod Lay Day chawhma inkhawmah Synod Moderator-in thu a sawi bakah, Upa R Lalmalsawma'n Lay Day thupui 'Rawngbawlna leh tunlai khawvel’ tih a sawi a; chawhnu inkhawmah hun zângkhai hman niin, lay worker pension-a chhuak mi 23 hnenah ngaihhruina hlan a ni. Synod Lay Workers Fellowship-ah hian member 998 an awm mek.
No Tobacco Day
World No Tobacco Day pualin nimin khan Serchhip High School-ah National Tobacco Control Program leh Women & Child Development department-in sikula zirlaite tan vaihlo zûk leh hmuam ṭhat lohna inzirtirna hun an buatsaih. Middle school leh high school zirlaite tan 'Zûk leh hmuam, ruihhlo laka naupang venhim' tih thupui hmangin lemziaka intihsiak buatsaih a ni.
Lunglei Dist Health Society ṭhukhawm
Lunglei DC Ramdinliani kaihhruaiin May 30, Ningani khan Lunglei District Health Society an ṭhukhawm a; natna inkài chhàwn theih loh, non-communicable diseases (NCD) laka Lunglei district him theihna tura duan Healthy Lunglei Campaign chu June 10, 2024-ah tlangzarh an rél. Lunglei district-ah hian NCD awareness campaign leh screening drive kalpui a ni a, May 25, 2024 thleng khan kum 30 chung lam mipa 31,823 leh 33,649-te hriselna dinhmun endik a ni tawh.