Walk for Drug Free Mizoram; Aizawlah CM hoin kawng zawh

Mizoram Police chuan Mizorama ruihhlo dona atan June 1, Inrinni zing khan Aizawlah ‘Walk for Drug Free Mizoram' an huai­hawt a; Chief Minister, Home Minister leh Excise & Narcotics Minister hoin Chanmari kâwn aṭanga Lammual thleng kawng zawh a ni.

Kawngzawhah hian mi 1,000 chuang an tel a, sorkar mi pawi­mawhte leh police-te bakah, tlawmngai pawl hrang hrang aiawh leh zirlaite an tel. Chanmari kawn aṭanga kal ṭanin, ruihhlo ṭhat lohzia tarlanna thuziak hrang hrang an keng a, Lammualah lutin, inkhawm buatsaih a ni.

Lammualah hian May 30, 2024-a Aizawl SP Conference Hall-a buat­saih, Walk for Drug Free Mizoram puala zirlaite tana 'Drugs free Mizoram. Yes, I can' tih thupui hmang­a lemziak intihsiaka pakhatna - pathumnate hnenah lawmman hlan a ni. Intih­siak­naah hian sikul 19 aṭangin zirlai 84 an tel a, high school leh higher secondary school category-ah ṭhen a ni.

Chief Minister chuan, ruihhlo vangin tun hnaiah Mizo ṭhalai, a bikin mipa an thih nasat thu leh hmeithai leh fahrah an tam phah thu a sawi a, "Hei hian Mizote hi hnam dam rei lo pawl tak min nihtir a, thlanmualah ṭhalai thlan a tam em em. Hetiang zela kan kal chuan kan hnam hian a la tuar hle dawn a ni," a ti.

Ruihhlo donaa hma la tura sorkarin a din Core Committee on Ruihhlo Do din thar leh a nih thu sawiin Lalduhoma chuan, "Ruihhlo donaah kan zavaia kan ṭan rual a ngai. Kan taksa duat a ngai a, kan taksa tichhe zawnga kan khawsak hi Setana hnathawh a ni a, mahse, Pathian chakna ringa kan zavaia kan do chuan kan hneh thei a ni," a ti a; sorkarin theihtawp chhuah a tum thu a sawi.

Home minister K Sapdanga chuan, Mizorama ruihhlo hluar chu tun hnai maia hluar a ni lo tih sawiin, "Sorkar thar a pian khan Excise Minister nen drugs lo luhna hmun nia rin khawchhak lam ramri-ah hna bul ṭan nghalin, sâwt zawka drugs do dan tur nasa takin kan ngaihtuah a ni," a ti.

Ruihhlo vangin Mizo ṭhalaite an thi tam tawh tih sawiin K Sapdanga chuan, "Namenloa kan do a ngai. Drugs zuartute leh a buaipuitute hi mi tam an ni lo a, a nghawng erawh chu mi tam tak kan ni thung. Ṭang rual ila, a vaia a rêm thei lo a nih pawhin a ziaawm thei a ni," a ti a; sorkar, khawtlang, kohhran, chhungkua, sikul leh tlawmngai pawlte an ṭanrual a ṭul thu a sawi.

Excise & Narcotics minister Lalnghinglova Hmar pawhin thu sawiin, “Ruihhlo do rêm tur hian sorkarin nasa takin hma a la dawn a, tlawmngai pawl leh pawl hrang hrang bakah, mipui, kan zavaia kan ṭan tlan a ngai a ni. Ruihhlo hi a zavaia tihrêm a har a ni thei a, amaherawhchu, tun aia a zalen loh zawkna turin theihtawp kan chhuah dawn a ni," a ti.

Mizoram DGP Anil Shukla pawhin inlawmna thu sawiin, kawngzawh chu ruihhlo donaah Mizoram mipuiin rilru an siam tharna atan leh an ṭan rualna lan­tirna atan buatsaih a nih thu a sawi.