DMR Minister-in khuarel chhiatnaa thite hnenah sorkarin a ràlna a hlan

Disaster Management & Rehabilitation (DMR) minister K Sapdanga chuan June 1, Inrinni khan Aibawk, Hlimen, Melthum, Kulikawn leh Chanmari West-a chhiatna thlenna hmun a tlawh a; chhiatnaa thi chhung­te hnenah sorkar aṭanga ràlna a hlan.

DMR Minister chuan, sorkarin ràlna hlân tur leh chhiatna thlenna hmunte tlawh tura an ruat thu a sawi a, "Chhiatna rapthlak tak kan tawh hi sawi mai aia rapthlak a ni. Vawiinah ruang hmuh lohte kan la nei mek a, hmuh thuai theih ni se ka duh hle," a ti.

Chhiatna thleng lo se tih chu an duh dan ni mah se, a thleng fo tih sawiin K Sapdanga chuan, "Chhiatna a thlena puih ngai apiang pui tur khawtlang mipui, khaw ṭhenawmte a thei thei kan thlan khawm zung zung hi Mizo nih tinuam­tu a ni a, a thlamuanthlak em em," a ti a, sorkar pawh an lawm thu a sawi.

Sorkarin ràlna a rang thei ang bera pek a duh thu sawiin Minister chuan, "Sorkar hmasa tih dan a nih leh nih loh lam emaw, infak leh insawiselna emaw, a tuar­tute tan pawha ngaihthlak nuam lo khawpa ṭawngkam cheh kan awm leh ṭhin hi a pawi hle. Chhiatna thlengah hian sorkarin eng hamṭhatna mah dawn kan beisei lo a, kan rilru pawh a ni lo. A rang lama lusûn chhungte harsatna tawh chhawm­dawl hi kan duh ber a ni," a ti.

DMR Minister hian mitthi chhungte hnenah sorkar aṭanga ràlna hmahruai Rs 2,00,000 ṭheuh a hlan a, ràlna thawh hnihna pawh a hma thei ang bera hlan leh a nih tur thu chhiat tâwk chhungte a hrilh.

Minister hian khua/veng hrang hranga chhiatna thlenna hmun a tlawhnaah hian hnatlangte ei leh in senso atan Rs 5,000 ṭheuh a hlân a, Aizawl South-III bialtu MLA Baryl Vanneihsangi leh sorkar official-te'n an ṭawiawm a ni.