Police vote thlâk theih loh chhanah sorkar puh

Mizoram Pradesh Congress Committee (MPCC) hnuaia Legal Department chairfman TT Zothansanga chuan, Lok Sabha inthlana Mizoram pawn state pathuma duty Mizoram police mi 1,047-te'n vote an thlak theih loh chhan chu ZPM kaihhruai sorkar vang niin a sawi.

TT Zothansanga hian June 1, Inrinni khan Aizawl Press Club-ah thuthar thehdarhtute kâwmin, Mizoram police mi 1,047-in vote an thlak ve thei lo chu pawi an tih thu a sawi a, "Vote an thlak phalsak ni lo a, an democratic right palzutsak an ni hi a pawi tak zet. A mawhphurtu bul ber chu tuna kan hrawn mek ZPM sorkar a ni," a ti.

MPCC Legal Department Chairman sawi danin, police mi 1,047-in vote an thlak thei dawn lo tih an hriat veleh Mizoram Chief Electoral Officer hnenah lehkha ziakin an thlen a, mahse, Election Commission of India-in a remti lo. Conduct of Election Rules-a Rule 18A-in a sawi dan chuan, election duty-a hmun danga chhuak turte'n an chhuah hmain postal ballot hmangin vote thlakna tur bika siam Special Facilitation Centre-ah vote an thlak tur a ni.

TT Zothansanga chuan, police-te'n vote an thlak theih nan ruahmanna siam loin hmanhmawh takin state páwnah sorkarin a thawn chhuak nia sawiin, "Aa dik lo a, a thinurthlak bawk. ZPM sorkar hian kan police-te chanvo Right to Vote ngaih pawimawhsak ni se chu Rule 18A anga vote an thlaktir phawt hnuah an tír chhuak mai tur a ni," a ti.

Police-te'n vote an thlak theih nan High Court-ah an zualko tih sawiin MPCC Election Department hotute chuan, "High Court hian kan ngennate min tihhlawhtlinsak theih dawn loh thu sawiin, kan petition pawh withdraw mai turin thurawn min pe," an ti a, an hmalakna a hlawhtling lo chu pawi an tih thu an sawi.

TT Zothansanga chuan, Nagaland pawhin state pawna inthlana duty turin police an tir chhuak a, anni chuan vote an thlak vek thei niin a sawi. Manipur leh state dang ṭhenkhat police-te'n vote an thlak theih loh ve tho chungchang zawhna chhangin, chu'ng state-te chu biak an tum a, mahse, an biakpawh theih loh thu a sawi thung.