Ni hnih chhungin ruang hmuh belh lo

May 28, 2024-a leiminin in a hnâwla mihring a hnâwl telte chu June 1, Inrinni leh nimin khan zawn chhunzawm a ni a, hmuh belh a ni rih lo. La hmuh lohte chu Melthumah mi pali leh Aibawkah mi pakhat an ni.

Melthuma leiminin a hnâwl zinga la hmuh loh mi palite chu lei minna hmun aṭanga Tlawng lui dungahte zawn a ni a, sorkar leh Central YMA hnuaia chhanchhuah hna thawk tur bika ruatte bakah, CYMA-in a ruat angin Aizawla YMA branch-te aṭangin mi tlawmngai eng emaw zat an thawk chhuak a, Assam Rifles leh Border Security Force mi leh sate an thawk chhuak bawk.

Aibawk khuaa leiminin a hnawl mi pakhat pawh zawn chhunzawm zel a ni a, nimin khan Aibawk khaw mite bakah, Chhimphei tlangdunga Hualngohmun, Melriat, Kelsih, Falkawn leh Muallungthu branch YMA member-te an thawk chhuak a, hmuh a nih loh chuan vawiinah Tachhip, Sateek, Maubuang leh Phulpui branch YMA member-te an thawk chhuak leh ang.

Leiminin a hnâwl, Tlawng dung thlenga zawn a nih bakah, Sihhmui kai, Sairang balukai, Sairang GOP kai, Hortoki kei leh Bairabi thlengin changtu indah a ni.

Melthuma leiminah hian mi 19 an thia hriat a ni a, mi 15 hmuh tawh niin, mi pali hmuh an la ni lo. Aibawka leiminah mi pahnih an thia ngaih a ni a, Vanlalruali (34) chu May 31, 2024 khan Tlawng lui, Hortoki bulah hmuh a nih laiin, a pasal Matthew Lalchhanhima (34) erawh chu hmuh a la ni lo.

May 28-a Mizoram hmun hrang hranga leiminin in a hnâwlah mi 34 an thia hriat a ni a, mi 29 hmuh tawh an nih laiin, la hmuh loh mi panga an awm a ni.